Келәш авылында зур колач белән Урам көне узды

Келәш авылында зур колач белән Урам көне — авылдашларны чын-чынлап берләштергән бәйрәм узды.

150гә якын кунак җыелды: хәзер авылда яшәүчеләр, монда үскәннәр, ә хәзер төрле шәһәрләрдә төпләнгәннәр һәм Келәшне чын күңелдән яратучылар.

Тантананың үзәгендә төрле ризыклардан сыгылып торган зур өстәл иде. Барлык кунакларга ошаган искиткеч тәмле пылау аеруча горурлык булды.

Кунаклар арасында Бөтендөнья татар конгрессының Тәтеш бүлеге җитәкчесе Рима Сафиуллова да бар иде. Аның котлавы ихлас күңелдән һәм җылылык белән тулы иде. Рима Гомәр кызы билгеләп үткәнчә, авыл халкының бердәмлеге — чын күңелдән шатлык уята торган кыйммәтле һәм күңелне нечкәртә торган күренеш.

Бәйрәм төрле яшьтәге кунакларны сөендерде:

балалар батутларда бик шатланып сикерделәр һәм бушлай баллы мамык белән сыйландылар;

өлкәннәр биредәге осталарның эшләрен: кулдан эшләнгән картиналарны һәм бизәнү әйберләрен кызыксынып карадылар. ;

теләге булган һәркем күңелле уеннарга, дәртле җырларга, биюләргә кушыла алды.

Авылның озын гомерле кешеләренең теләкләре - зирәклек һәм мәрхәмәт тулы җылы сүзләре күңелләрне нечкәртте.

Урам көне чын мәгънәсендә онытылмаслык булып чыкты: ул бик күп якты хисләр бүләк итте, традицияләрнең мөһимлеген искә төшерде һәм авылдашлары арасындагы элемтәләрне ныгытты.

Келәш авылы киләчәктә дә шундый ук дус һәм бердәм булып калсын, ә мондый бәйрәмнәр күркәм традициягә әверелсен!