Куяннарны һәм йорт кошларын исәпкә алу

– Терлекләрне маркировкалау һәм исәпкә алу хайваннарда йогышлы авырулар таралуны булдырмау, шулай ук аларның чыганакларын һәм таралу юлларын ачык­лау максатларында гамәлгә ашырыла. Авыл хуҗалыгы кошлары гражданнарның шәхси хуҗалыкларында, кагыйдә буларак, ачык киңлектә тотыла, сулыкларга керә ала, димәк, кошларның йогышлы авырулары чыганагы булырга мөмкин синантроп һәм кыргый кошлар белән элемтәгә керә ала. Йорт кошларына йогышлы авырулар, шул исәптән аеруча куркыныч авырулар китереп чыгаручы авырулар йоктырмас өчен (аларның кайберләре кеше өчен дә куркыныч), кошларга вакцинация һәм авыруны профилактикалауга юнәлдерелгән ветеринария эшкәртүләре ясыйлар, – дип билгеләп үтте Россельхознадзорның Татарстан Рес­публикасы идарәсе дәүләт инспекторы Гөлнара Арсланова.

Аның сүзләренә караганда, кош-корт һәм куяннар өчен төркемләп маркировкалау рөхсәт ителә. Бу очракта уникаль номер һәр хайванга аерым түгел, ә бөтен төркемгә бирелә. Маркировкалау чарасы, мәсәлән, номерлы табличка хайваннар яки кошлар тотыла торган бинаның үзендә ­урнаштырыла.
Терлекләрне маркировкалау терлек хуҗалары тарафыннан мөстәкыйль рәвештә яисә дәүләт ветеринария хезмәтенә мөрәҗәгать итү юлы белән башкарыла.

Хайваннарны (хайваннар төркемен) мөстәкыйль маркировкалаганнан соң, хуҗа аларны исәпкә алу максатларында 5 эш көне эчендә маркировкаланган хайваннар турында мәгълүматны исәпкә алуны гамәлгә ашыручы затка җибәрә. Кагыйдә буларак, күрсәтелгән белешмәләр район ветеринария берләшмәсенә керә.

– Элек исәпкә алынган хайваннар һәм кошлар турында белешмәләр сатылган һәм үзгәртелгән очракта, хуҗа ветеринария өлкәсендәге белгечкә үзгәрешләр турында мәгълүмат бирә. Хайваннарны исәпкә алуны гамәлгә ашыру кагыйдәләре һәм шәхси яки төркемләп маркировкаланырга һәм исәпкә алынырга тиешле хайваннар төрләре исемлеге, хайваннарны шәхси яки төркемләп маркировкалау һәм исәпкә алу очраклары, шулай ук хайваннарны исәпкә алуны гамәлгә ашыру срок­лары Россия Федерациясе Хөкүмәтенең 2023 елның 5 апрелендәге 550 номерлы карары белән расланды. Карар 2024 елның 1 мартында үз көченә керде, – дип хәбәр итә Гөлнара Ринат кызы. – Россия Федерациясе Авыл хуҗалыгы министрлыгының 2023 елның 3 ноябрендәге 832 номерлы боерыгы белән расланган терлекләрне маркировкалау һәм исәпкә алуның ветеринария кагыйдәләре нигезендә авыл хуҗалыгы кошлары Россия Федерациясе территориясенә чыгарылганнан яисә кертелгәннән соң 7 көн эчендә маркировкаланырга тиеш. Россельхознадзорның Татарстан Республикасы идарәсе шәхси ярдәмче хуҗалык тотучыларны шәхси ярдәмче хуҗалыкларда кош-кортны исәпкә алуга җитди карауларын үтенә, чөнки ул илнең биологик иминлеген тәэмин итү өчен принципиаль мөһим аспект булып тора.

Фото: ИИ