Самавыр тарихына сәяхәт

Түбән Тархан җирлек ки­тапханәсенең әйдәп ба­ручы китапханәчесе Гүзәл Шәмсетдинова авылның “Ак калфак” татар хатын-кыз­лары иҗтимагый оешмасы вәкилләре белән берлектә чын мәгънәсендә җанлы, тарихи һәм табигать кочагында рухи азык бирә торган очрашу оештырды.

Бу күркәм чара гади генә баш­ланмады: анда кат­нашу­чылар иң элек та­бигатьнең иң гүзәл поч­ма­гына – саф, салкын сулы чишмә аккан урынга юл тоттылар. Самавыр кайнату өчен суны нәкъ менә шушы чишмәдән алу очра­­шуга үзенчәлекле бер җылылык һәм милли рух өстәде.

Чарада катнашучылар шун­нан соң авыл янә­шәсендәге болынга бардылар. Алар табигать биргән хәзинәләрне – хуш исле, дәвалау үзлекләренә ия дару үләннәрен җыйдылар. Җыеп алынган яшел үлән­нәрнең исе, табигатьнең ма­турлыгы һәркемгә күтәренке кәеф, җан рәхәтлеге өстәде.

– Очрашу барышында самавырның барлыкка килү тарихы һәм безнең халыкта чәй эчү йолалары турында бик кызыклы һәм мавыктыргыч әңгәмә оештырылды. Сама­вырлы өстәл янында  узган очрашу татар гаиләсендәге бердәмлекне, дуслыкны сак­лауда нинди зур әһәмияткә ия булуын ассызыклады. Катнашучылар үзләренең балачакларын, яшьлек ел­ларын искә алдылар, ­гаи­лә, тормыш-көнкүреш турын­дагы хатирәләре белән уртаклаштылар, – диде Гүзәл Шәмсетдинова.

Чишмә суы, самавырдан күтәрелгән пар очрашуга тагын да күңеллелек, ә табигатьтә үскән үлән­­нәрдән ясалган чәй гаҗәеп бер тәмлелек һәм шифа өстәде.

– Ачык һавада, табигать кочагында самавыр куеп, хуш исле чәй әзерләнде. Катнашучылар табигатьнең гүзәллегеннән ләззәт ал­ды­лар. Тәмләп чәй эчү, ихлас сөйләшеп утыру һәркемнең күңелендә якты тәэсирләр калдырды, – дип билгеләп үтте Гүзәл Наил кызы.

Мондый чаралар күркәм йолаларны, туган җиргә, табигатькә булган яратуны сакларга, аны яшь буынга җиткерергә ярдәм итә, авыл кешеләрен берләштерә.   

фотоны Гүзәл Шәмсетдинова тәкъдим итте