“Ул тәртипле, таләпчән кеше иде”

(Тәтеш, 6 август, "Тәтеш таннары").

Сергей Михайлович 1957 елның 16 маенда Тәтештә туган.
Югары хәрби инженерлар училищесы чыгарылышы, ул озак вакытлар Украинада хезмәт иткән. Шунда ук финанс-икътисад институтын тәмамлый.

СССР таркалган чорда армия авыр вакытларны кичерә, шуңа күрә Сергей Михайловичка эшчәнлек өлкәсен алыштырырга туры килә. Салым инспекциясендә, контроль-ревизия идарәсендә эшли, ә 1997 елда хатыны һәм ике улы белән туган ягына кайта. Тәтештә аңа район хакимиятенең бер бүлеген җитәкләргә тәкъдим итәләр, ә 2000 елда инде Россия Федерациясе Федераль суд приставлары хезмәте идарәсенең Татарстан Рес­публикасы буенча Тәтеш районы бүлеге начальнигы итеп билгелиләр, бу вакытта анда бары тик бер хезмәткәр генә эшли.

Башта Альберт Абдурахманов белән икәү эшлиләр. Бүлек кечкенә генә бүлмәдә урнашкан була, аның зур өлешен төрле кәгазьләр һәм документлар алып тора.

Сергей Михайловичка нульдән башларга һәм хәтта юрист һөнәрен дә үзләштерергә туры килгән дип әйтергә була. Моның өчен социаль-юридик инс­титутны тәмамлый.
Вакытлар узу белән штат киңәя, 2010 елда бүлектә 16 хезмәткәр эшли башлый. Ул җитәкләгән Россия Федерация­се Федераль суд приставлары хезмәте идарәсенең Татарстан Рес­публикасы буенча Тәтеш районы бүлеге еллык эшчәнлек нәтиҗәләре буенча берничә тапкыр призлы урыннар яулый.
Сергей Михайлович 2017 елның 7 мартында вафат булган.

Людмила Сухова, хатыны:

– Чын ир буларак, ул өч әйбер эшләде: йорт төзеде, агач утыртты һәм уллар үстерде. Ашарга пешерергә яратты, ул шулай ял итә иде. Аның барысы да яхшы килеп чыга иде. Әгәр миңа кунакка дусларым килгәндә, Сережа аш-су әзерләгән булса, алар сокланалар иде. Табигатьне, гөмбәгә йөрергә яратты. Көз көне без һәрвакыт гөмбә җыярга бара идек.
Юбилейга кадәр, Франциягә барган бер танышыбызга ул минем өчен бүләк – чын француз ислемае алып кайтырга кушкан. Бу мине бик тәэсирләндерде һәм көтелмәгәнчә булды. Гомумән, ул бүләкләр һәм сюрпризлар ясарга ярата иде.

Андрей Наумов, хезмәттәше:

– Сергей Михайлович белән без 2002 елдан 2016 елга кадәр эшләдек. Ул тәртипле, таләпчән кеше иде. Эш өчен дә, аның җитәкчелегендә Татарстанда иң яхшыларның берсе булган бүлекнең шәхси составы өчен дә борчылды. Без бергәләп тораклардан чыгару буенча аеруча катлаулы башкару эшләренә бара идек. Питомникта яшәүче бер кешене ике атна буе яшәү урыныннан чыгардык, ул, әгәр тагын килсәк, безгә карата корал кулланачагын әйтте. Сергей Михайлович беренче булып өйгә керде, аннары гына без кердек.

ТРның атказанган юристы Сергей Сухов югары профессиональлеге һәм вазифаларына намуслы караганы өчен Россия Федераль суд приставлары хезмәтенең “Казанышлар өчен” медале, Россия Федераль суд прис­тавлары хезмәтенең I һәм II дәрәҗә “Хезмәт өчен” медальләре, “ФСПХ ветераны” медале, Россия баш суд приставының Мактау грамотасы, Россия Федераль салым хезмәте җитәкчесенең Рәхмәте белән бүләкләнгән.