Җиңүләргә юл шулай башланган

(Тәтеш, 7 апрель, “Тәтеш таңнары”).  “Тәтеш таңнары” газета­сы­ның тулы ике бите әлеге гаҗәеп вакыйгага багышланган булган. “Тәтешлеләрнең сенсацион дебюты Бөтенроссия спартакиадасы алдынгыларының күбесенең кәефен кырды” дип исемләнгән мәкаләдә журналист Александр Бибин безнең кадетларның казанышлары турында тулысынча итеп язган.

Без унике ел элек Оренбургка ярышта катнашырга баручылар белән аралаштык.

Римма Афанасьева, Тәтеш кадет мәктәп-интернаты директоры урынбасары:

– Спартакиадада бөтен Россия­дән иң яхшы 48 команда, 800 малай һәм кыз катнашты. Призерлар булырбыз дип, хыялланмадык та. Татарстан командасы бер ел алдарак бөтенроссия ярышларында 21нче урынны алган иде. 

Оренбург, 2003 ел. Безнең дебют, җиңү­ләргә юл башы. Югыйсә без, алдынгылар исәбенә кермәгән булсак та, беренче көннән үк үзебезгә игътибарны юнәлтә алдык. Без утырып барган автобусның алгы тәрәзәсенә зур итеп “Тәтеш” дип язылган иде. Безнең балалар беренче минутлардан ук барысын да үзләренең үҗәтлеклә­ре, бердәм һәм нык булулары белән га­җәпләндерделәр. Буш вакыт булуга ук  алар киләсе бәйгегә әзерләнә
башладылар. Пятигорскидан безнең дуслар, хезмәттәшләр: “Сезнең балалар үзенчәлекле, аларны беркем дә мәҗбүр итми, алар үз-үзләренә шөгыль таба”, – дигән иделәр. Балалар Мәскәү, Санкт-Петербург, Барнаул һәм башка шәһәрләрдән килгән командалар белән лаеклы көндәшлек итү өчен үзләренең барлык көчләрен, осталыкларын һәм сәләтләрен эшкә җигәргә кирәклеген бел­деләр. Без, кечкенә шәһәрдән килүчеләр өчен, аларның барысы да көчле һәм ышанычлы булып тоелды. Акрынлап без дә үзебезне күрсәтә башладык. Ату бәйгесе нәтиҗәлелеге буенча кызык һәм көтелмәгәнчәрәк булды, беренче урынны алыр өчен безнең командага ату вакытында көндәшләрнең, Мәскәү кадетларының 7 мишененә тидерергә кирәк иде. Сыбызгы тавышыннан соң ук барлык мишеньнәр дә юк ителде. Әмма корал белән яхшы эш итеп һәм тиз йөгереп кенә калмыйча, шулай ук тарихны һәм хокукны да яхшы белергә, оста итеп җырлый һәм бии дә белергә кирәк иде.  

Бәйге­челәр бик тә күп, 
Һәркемнең җиңәсе килә. 
Безгә ялгышлык җибәрмәскә 
Һәм Татарстанны сынатмаска кирәк! 
– дип безнең хәрби кәгазьгә язылганлыгын хәтерлим әле. Беркемнең дә начар чыгыш ясыйсы килмәде, әлбәттә. Без икенче гомумкоманда урынын яуладык. Тәтешкә горурланып һәм бәхетле булып кайттык. Әлеге команда тарафыннан нигез салынган данлы традицияләр шәкертләребез өчен бүгенге көнгә кадәр үрнәк булып торуына ышанам. Спартакиадада катнашу балаларның, идея белән рухландыручы һәм оештыручы Геннадий Васильевич  Митрофанов җитәкчелегендәге искиткеч, бердәм командадагы малайлар һәм кызларның язмышына, киләчәктә һөнәр сайлавына йогынты ясады. 

Илнар Арсланов, катнашучы: 

– Безнең директор Геннадий Васильевич Митрофанов, физкультура укытучылары Александр Константинович Долгов, Алексей Владимирович Похлебкин, Евгений Владимирович Малкин башлангыч сыйныфлардан ук бездә ватанпәрвәрлек һәм иксез-чиксез Ватаныбызга мәхәббәт тәрбияләделәр. Оренбургка барганчыга кадәр без район, зона һәм республика күләмендәге ярышларда беренче урыннарны яуладык. Спартакиадага көн саен, берничә ай дәвамында әзерләндек. Мәктәп укучылары буларак, без үзебезгә нинди җаваплылык йөкләнгәнен аңладык.      

Оренбургта безне яхшы каршы алдылар. Һәр командага хәрби училищелардан җаваплы курсантларны билгеләделәр. Безнең командага – игезәкләр Илнур белән Ильмирны куйдылар, алар белән без ярыш вакытында бик нык дуслашып киттек. 

Рух күтәренкелеге һәм дулкынлану көчле булды, чөнки безнең көндәшләр физик һәм рухи яктан нык әзерлекле кадет корпуслары һәм Суворов училищесы укучылары иде. Нерв киеренкелеге арта барды, чөнки ярыш этаплары катлаулы иде, шулай да без үзебезнең остазларны уңайсыз хәлдә калдыра алмадык.  Безнең командадагы кызлар физик әзерлектә кайбер егетләргә дә бирешмәделәр. Команданы мин җәйге биатлонда тәкъдим иттем. Анда ике этапта: басып һәм яткан килеш атып, бер чакрым йөгерергә кирәк иде. 52 катнашучыдан мин, Мәскәүдән килгән кадеттан гына калышып, икенче урынны алдым. Авырлыкларга һәм дулкынлануларга карамастан, безнең команда икенче урынны яулады. Ә физик әзерлек һәм ихтыяр көче ярдәмендә безнең малайлар һәм кызларның күбесе хәрби һәм көч структуралары хезмәткәрләре булдылар.