Исемең җисемеңә туры килсен

(Тәтеш, 20 ноябрь, “Тәтеш таңнары”, Эндже Газизова)  Әлеге матур вакыйгага әти-әни алдан ук әзерләнә башлый: бала тәрбияләү турында китаплар укый, кибетләрдә матур киемнәр, уенчык­лар сатып ала һәм иң мөһимнәренең берсе  – исем сайлый башлый. 

Ишетеп бел­гәнебезчә балаларга төрле исем­нәр кушалар: кемдер чит илдән алынган исемнәрне сайлый, кемдер кино геройларының исем­нәрен куша, күбесе үз диненә, мил­ләтенә кагылышлы исемнәрне бирергә тырыша. Бу бик җитди мәсьәлә. Чөнки исем кешене гомере буена озата бара. Аның матур һәм мәгънәле булуы бик мөһим. Һәм һәр халыкның исем кушуга  кагылышлы үз ­йола­лары бар. 

Мө­сел­маннарда бу йола ничек башкарылуы хакында безгә Тәтеш рай­оны имам-мөхтәсибе ­Инсаф хәз­рәт Җәләлет­динов сөйләде:

– Балаларга исем кушу бик җаваплы һәм җитди гамәл. Мө­селманнарда бу йола бала тугачтын атна-ун көн эчендә башкарылырга тиеш. Аны ничек тизрәк кушсаң, бала да тыныч булыр, күз тимәс дип фаразлыйлар. 
Гадәттә әлеге йоланы үткәрү өчен имам чакырталар. Мәҗлестә шулай ук баланың әти-әнисе, әби-бабасы, туганнары булу зур роль ­уйный. 

Исемне бары тик ир­ләр генә кушарга хокук­лы. Исем биргәнче имам әти-әнисе белән нинди исем кушарга теләүләре, әлеге исемнең мәгънәсе турында  фикер алыша. Әгәр дә исем мәгънәсез, мөселманнарга кагылышлы түгел икән, имам исемне кушудан баш тартырга да мөмкин. 
Исем кушканда баланы чиста, ак тукы­мага төреп, мендәргә салып ките­рәләр. Бу әлеге сабый­ның киләчәге якты, пакь булсын өчен шулай эшләнә. 

Мәҗлескә җыел­ган ке­ше­ләр тыныч кына утырырга тиеш. Имам баланың башын кыйб­лага каратып уң колагына азан, сул колагына камәт әйтә, шулай ук баланың колагына аның исемен һәм әтисенең исемен пышылдый. Аннан соң, Коръәни Кәримнән бер сүрә укыла. Сабыйның җәмгыятьтә күркәм ке­ше булып үсүен, ди­ненә, милләтенә ях­шы карашлы бала булуын теләп догалар кылына. Һәм әлеге матур  вакыйга белән баланың әти-әнисе тәбрикләнә. Әлеге йоланы үтәү гаилә мөнәсәбәтләрен ны­гыта, ата-аналарга һәм якын­нарына бәхет-шатлык китерә.

Шунысы куанычлы, мил­ләт­тәшләребез балаларына мәгънәле исемнәр би­рергә тырышалар. Күп кенә күр­­кәм исем­нәр пәй­гам­бәрләребез исемнәре белән бәйле: Ильяс, Муса, Йосыф, Гайсә. Хәдичә, Фатыйма, Сара, Әминә, Зәйнәп кебек хатын-кыз исемнәре дә бик матур яңгырый. Саный китсәң андый күркәм исемнәребез бик күп. Чөнки аларны әби-бабаларыбыз төптән уйлап кушканнар. 

Шуңа күрә балаларыбызга милләтебезгә, динебезгә туры килә торган исемнәрне бирик. Җисем исемне, исем җисемне бизәсен иде.