Конкурста җиңү – бәйрәмгә бүләк

(Тәтеш, 10 март, “Тәтеш таңнары”, Мәдинә Ибәтуллина).Халыкара хатын-кызлар көне алдыннан Казанда Салих Сәйдәшев исемендәге зур концерт залында “Ел хатын-кызы. Ел ир-аты: хатын-кыз карашы” респуб­лика конкурсына йомгак ясалды.

1998 елда ук салынган матур гадәт буенча, сәхнәдә конкурста җиңүчеләрне – Татарстанның барлык шәһәр һәм районнарыннан килгән, төрле эшчәнлек өлкәләрендә югары нәти­җәләргә ирешкән гүзәл затларны хөрмәтләделәр.

Финалга чыгучыларга бүләк­ләрне ТР Премьер-министры Алексей Песошин тапшырды. Ел саен бәйге республиканың 43 районыннан, Казан һәм Яр Чаллы шәһәрләреннән үз эшләрендә уңышлы хезмәт куючы хатын-кызларның яңа исемнәрен ача. Быел зона турларына 300дән күбрәк катнашучы тәкъдим ителгән, алар арасында 101 кеше финалга чыккан.

Рәмзия Рафикова “Ха­тын-кыз – бизнес леди” номинациясендә җиңүче булды. Бүгенге көндә районда гына түгел, ә аңардан ары да билгеле булган беренче кафесын ачканга май аенда 15 ел тула. Үзе яшәгән шәһәренә битараф булмаган ханым зур эшкә алынган һәм предприятиенең ныклыгын әлеге еллар  сынаган. Шактый көчле көндәшлек булуга карамас­тан, Рәм­зия Әхмәт кызы бизнеста уңышлы үсешкә ия, ул район икътисадында үз урынын ныклы тота һәм яңа эш урыннары булдыра. Бүгенге көндә шәһәрдә аның җитәкчелегендәге өч кафе эшли. 

Рәмзия Рафикова хәй­рия эшчәнлеге белән дә шөгыльләнә, әмма моны белгертмәүне өстен күрә, Татарстан Президенты каршындагы эшмәкәрләр хокукларын яклау буенча вәкаләтле вәкилнең Тәтеш районындагы иҗтимагый вәкиле булып тора.

– Гаиләбез Апас рай­о­нының Кече Болгаер авылыннан Тәтеш шәһәренә күченгәндә Рәмзиягә 4 яшь иде, шуңа күрә ул бу шәһәрне туган җире дип саный, – дип ­уртаклаша Рәмзия Әхмәтовнаның әнисе Мәрьям Нотфулла кызы. – Аның бабасы Миңнулла Гарипов үзенең хезмәт сөючәнлеге белән дан тотты: мич тә чыгарды, итекләр дә баса белде... Рәмзиянең әтисе дә аңардан иң яхшы сыйфатларны өйрәнеп калган: бөтен эшкә кулы оста булды. Кызым да шундый ук – бернинди эштән дә курыкмый, шуңа күрәдер инде, аның барысы да алдан ук ниятләп куелганча уңышлы килеп чыга.  

– Эшмәкәр булу җи­ңел­ме? – дигән сорауга мин болайрак җавап бирәм – бухгалтер да, повар да, юрист һәм шофер да, товар белгече һәм дизайнер да булырга туры килә. Эшмәкәр булу җиңел түгел һәм җаваплы, – дип сөйли Рәмзия Әхмәт кызы. – Катлаулы хәлләр дә була, алардан гыйбрәт аласың. Иң мөһиме, минем ышанычлы терәгем – ирем, балаларым, туганнарым һәм якыннарым, вакыт белән сыналган тату коллективым һәрчак янәшәмдә. Үз хезмәтеңне чын күңелдән, сыйфатлы итеп башкару әһәмиятле. Узган тантаналы чара миңа искиткеч тирән тәэсирләре белән истә калды, зал гүзәл һәм хезмәт сөючән хатын-кызлар белән тулы иде, аларның һәрберсеннән үрнәк алырга мөмкин. Танылган артистлар һәм иҗат коллективлары бик матур концерт программасы бүләк иттеләр. Бу көн миңа яңа үрләр өчен гаять зур көч-кодрәт бирде, киләчәккә ниятләп куелган эшләр күп әле. 

Тышлыгына фотосурәте һәм аның эшчәнлеге турындагы зур мәкалә языл­ган журнал тапшыру Рәмзия Рафикова өчен тагын бер күңелле мизгелләрнең берсе булган.
 

Тантаналы чарада рай­он башкарма комитеты җитәкчесе урынбасары Наталья Николаева, районның “Татар гаиләсе” һәм “Ак калфак” иҗтимагый оешмалары җитәкчесе Рима Сафи­уллова, татар милли-мә­дәни үзәге җитәкчесе Асия Ибраһимова, җәмә­гатьчелек активистлары Юлия Тимарина белән Румия Шәйхетдинова составындагы район делегациясе катнашты. 

фото: tatarstan.ru