“Омикрон”. Вакцинация файдалы булуын дәлилли

(Тәтеш, 23 гыйнвар, “Тәтеш таңнары”). Бу хакта һәм коро­на­вирусның яңа төренең үзенчәлекләре турында безгә ТР буенча Роспот­ребнадзор Идарәсенең Тәтеш, Буа, Апас, Чүп­рәле районнары ­тер­риториаль бүлеге начальнигы урын­басары Олег Мазюкин сөйләде.

– “Омикрон” йоктырган вакытта күбрәк хәл­сезлек һәм баш авыртулары борчый, еш очракта исне сизмәү һәм тәмне тоймау күзәтелә. Тула­ем алганда, чирнең бил­геләре безгә күптән таныш сезонлы ОРВИга охшаш: температура 38 градуска кадәр күтәрелү, кайчагында югарырак та булу, мус­кул һәм буыннар авырту, борын тыгылу, томау төшү, тамак төбе авырту, төчкерү, ютәлләү, ашыйсы килү теләгенең кимүе күзәтелә. Кайбер авыруларның тән температурасы түбәнәю, ә балаларда – йокы ки­лү билгеләре була. Авы­ручыларның күбесе ин­фекцияне җиңел төр­дә кичерә. Әмма, ви­русның яңа төренең үзен­чә­лекләре кешеләр арасын­да тиз таралуга гына йогынты ясап калмыйча, сулыш юлларын, үпкәләрне дә тиз һәм актив рәвештә зарарлый, бу алдагы штаммнарга караганда, “омикрон”га тагын да җитдирәк итеп карау кирәклеген дәлилли. Шуны истә тотарга кирәк, алардан аермалы буларак, “омикрон” вакытында кеше беренче көннән үк чирне йоктыручыга әйләнә. Ике көннән алып биш көнгә кадәрге аеруча да кыска инкубация чорын – КОВИД-19ның яңа төренең үзен­чәлеге дип атыйлар, бу аның бик тиз арада таралуын аңлата да инде. Бу элек күрелгән һәм билгеле булган профилактик чараларның барысын да үтәүне дә­вам итү кирәклеген ис­кәртәдәдер, мөгаен. Авыру билгеләре артканда мөмкин кадәр тизрәк изоляцияләнергә, медицина ярдәме сорап мөрәҗәгать итәргә һәм профилактикалау буенча барлык тәкъдимнәрне төгәл үтәргә – битлек кияргә, кулларны юарга, ераклыкны үтәргә һәм вакцина ясатырга кирәк. КОВИД-19дан прививка ясатмаган кешеләр һәм, өлкән яшьтәгеләр, шулай ук хроник авырулары булган кешеләр элеккечә үк куркынычлылык төркемендә кала бирәләр. Вакцина ясату, коронавирусның башка төрләрендәге кебек, иң ышанычлы саклану ысулы булып кала бирә.