Алексей Тужилкин белгечлеге буенча бөтенләй дә инженер түгел, ә тракторчы-комбайнчы

(Тәтеш, 11 сентябрь, “Тәтеш таңнары”).

Алексей Викторович белгечлеге буенча бөтенләй дә инженер түгел, ә тракторчы-комбайнчы. Аның әйтүенчә, авыл хуҗалы­гы эшләрен җиңеләйтү өчен махсус җайланмалар ясау белән шөгыльләнергә ихтыяҗлык мәҗбүр иткән.

– Туксанынчы елларда колхозлар таркалган ­вакытларда кешеләр шәхси ярдәмче ху­җалыкка күчә башладылар. Ул чакларда нәрсәдер сатып алу кыйммәткә төшә иде, ә колхозда тимер-томырны бары тик акчага гына яздырып алырга мөмкин булды. Һәм мин хуҗалык алып бару өчен тагын да уңайлырак техник әйберләрне үзем ясарга булдым, – ди кул остасы.  

Печәнне җыю өчен әйлән­дергеч уйлап тапкан. Алексей Викторович аның өстендә ай ярым эшләгән. Ир-ат билгеләп үткәнчә, әйберне ясауга караганда, алга таба техниканы ясау ысулларын уйлап табу өчен вакыт күбрәк сарыф ителә. Элегрәк аңа нидер уйлап табып, моны тормышка ашырырга туры килмәгән булган, ләкин аның күңелендә ниндидер яшерен сәләте булган, дип саный ул. Тора-бара үз куллары белән ясаган әйберләре арта барган. Уңган авыл кешесенең хуҗалыгында кар эттергеч, бәрәңге казыгыч, өю җайланмасы һәм башка бик күп нәрсәләр бар.  Мәсәлән, печән чапкычның озынлыгы дүрт метр. 

– Ул печән әзерләргә кереш­кәндә үлән чабар өчен кирәк, – дип күрсәтә техниканы Алексей Викторович. – Аны ясауга якынча ике ай вакыт китте. Һәр­бер кисәкне бүлеп кисәргә, ә аннары калганнары белән ялгарга кирәк иде. Моның бе­лән беррәттән кайчагында нәр­сәнедер яңадан эшләргә һәм яңа баштан башларга туры килде. Печән җитәрлек күләмдә кирәк. Аны ун сыерга һәм сарыкларга ашатабыз. Республика программасында катнашып, 8 сыерга исәпләнгән бина төзедем. Мине районның авыл хуҗалыгы һәм азык-төлек идарәсенә чакырдылар, берникадәр вакыттан соң 200 мең сум акчаны капладылар. Авылларда хезмәт куйган кешеләргә хәзерге вакытта дәүләт зур ярдәм күрсәтә.Мине төрле эш кораллары, аппаратлар, машиналар җәлеп итә. Чуаш Чагылдымы авылыннан якынча 10 ел элек 30 мең сумга агачтан ясалган борынгы йон тетү җайланмасы сатып алдым. Бүгенге көндә бу бит инде ­раритет. 

Урак өсте – Алексей Тужил­кинның кызу эш вакыты. Ул тракторына утыра да кырга китә. Анда, штурвал артында утырган чагында да ул яңа идеяләр уйлап табадыр, мөгаен.