Аңа яңа техниканы ышанып тапшырганнар

Бакырчы авылында яшәүче Мөссәлим абый агымдагы елның март аенда үзенең 90 яшьлек юбилеен билгеләп үтәчәк.

– “Кайда туган, шунда кирәге чыккан” дигән әйтем нәкъ тә минем хакта, – ди Мөсәллим Абдрахман улы. – Авылымнан озакка бары тик армиягә генә киттем, Мурманск өлкәсендә хезмәт иттем. Ул вакытта авылдашларымның барысы да диярлек “Алга” колхозында хезмәт куя иде. 1958 елда, белгечләр кирәк булганлыктан, колхоз юлламасы белән Монастырскийдагы һөнәри техник училищега укырга кердем. Анда тракторчы-машинист һөнәрен үзләштергәннән соң эшли башладым. Беренче тракторым 35 ат көчле, кабинасыз көпчәкле трактор булды. Мине тәҗрибәле тракторчы Рәис Төхвәтуллин янына куйдылар. Ул миннән күпкә өлкән иде, аның туфрак эшкәртү һәм техника белән эш итү буенча киңәшләре миңа бик ярдәм итте. Эш һәрвакыт җитәрлек булды – җир дә сөрдек, тырмаладык та, культивация дә ясадык, авылдашларның бакчаларын да сөрдек.

Булдыклы механизаторга ике елдан соң яңа МТЗ-80 тракторын ышанып тапшыралар.

– Бу күк белән җир арасы кебек иде. Трактор яңа, өстәвенә кабиналы! Биредә инде алмашчысыз, гадәттә иртәнге 6дан кичке 6га кадәр эшләдем. Җиңелчә төзексезлекләрне үзем көйләдем, карадым, чистарттым, буядым. Катлаулырак очракларда – Тархан ­МТСына илтә идем. Җир эшкәртүдән тыш, ягулык материаллары, ашламалар ташыдым, төрле йөк ташу белән шөгыльләндем. Көзен салам эскертләдек, аны басуда калдыра идек. Кышын исә чылбырлы тракторлар белән фермага ташыдык. 1970 еллар башында миңа яңа куәтле техника – К-700 бирделәр. Тырышып эшләгәч, нәтиҗәләрем дә яхшы булды. Язгы кыр эшләре вакытында техника туктап тормасын өчен алмашчы белән эшләдек. Җәен еш кына Тольяттига ашлама алып кайтырга, Ижевскига агач материалларына бара идем. Бу техника миңа унөч ел яхшы хезмәт итте. Колхозда тракторлар күп иде – чылбырлысы да, көпчәклесе дә. Механизаторлар да җитәрлек, арада яшьләр дә, пенсионерлар да бар иде.

Мөсәллим Җаббаровка шикәр чөгендере басуларында да эшләргә туры килгән.

– Ул вакытта чөгендер җире 100 гектардан ким булмый иде. Миңа яңа чөгендер җыю тракторын ышанып тапшырдылар – аның белән чөгендер дә чәчтем, үсентеләрне дә эшкәрттем, уңышны да җыйдым. Пенсия яшенә җиткәч тә әле күпмедер эшләдем, – ди авыл кешесе.

фото: tetushi.tatarstan.ru