Аның ягымлы йөзеннән бәхет нуры сирпелә

(Тәтеш, 6 март, “Тәтеш таңнары”). 

– Гомеремне музыкага багышлаячагымны дүртенче сыйныфта укыганда ук белә идем. Безнең Скворцовлар нәселендә барысы да иҗат белән бәйле иделәр: абый консерваторияне тәмамлады, апа опера театрында җырлады, әби-бабайлар оркестрда уйнаганнар, – дип сөйли Тамара Николаевна.

Кызның 1нче урта мәктәпне тә­мамлаганнан соң, мә­дәният инс­титутының дирижер-хор бүлегенә укырга керүе бер дә гаҗәп түгел. Аны уңышлы тә­мамлагач, Тәтештә район мәдә­ният йортында һәм бер үк вакытта музыка мәктәбендә эшли башлаган. Аңа дәресләрне алып бару да, кечкенә талантларны күзәтү дә бик ошаган. Тамара Николаевна берникадәр вакыттан “Миләшкәй” балалар бакчасына музыка җитәкчесе булып ­урнашкан. 

Музыка белән гомер юлы буйлап 
“Кеше үзен теләсә нинди эштә дә таба ала дип уйлыйм”, – ди ул. Шулай итеп яңа эшендә дә Рима Гәрәй кызы Гасимова, Надежда Федоровна Ануфриева, Флера Әсхәт кызы Вәлиуллова һәм башка кешеләр даирәсендә мәктәпкә­чә тәрбия бирүнең дә барлык үзенчәлекләрен ачкан – чын күңелдән, нәтиҗәле, тырышып эшләгән. Бәйрәм чараларына, тематик утренникларга сценарийлар язган һәм оештырган. Балалар район мәдәният йорты сәхнәсен дә яулаганнар. Тамара Николаевна “Миләшкәй”дә 17 ел эшләү дәверендә хезмәттәшләренең һәм сабыйларның ата-ана­ла­рының хөрмәтенә иреш­кән, халык мәга­рифе отличнигы булган. Район мәдәният йорты каршында эшләп килүче ветераннар хоры да, ул аңа 20 ел җитәкчелек иткән, күңеле­нә рух күтәренкелеге өстәгән.

– Хорны нигездә абруйлы кешеләр тәшкил итте. Мин алардан күп нәрсәгә – сабырлыкка, үзара аңлашуга, хөрмәткә, киң күңеллелеккә өйрәндем. Фес­тивальләргә, конкурсларга бару, чыгышлар ясау – ул минем тор­мышымның гаҗәеп вакыты булды, – ди әңгәмәдәшем, ул җитәкчелек иткәндә хор “халык” исемен алган.

Әкияти ил
Тәтештә “Әкият” балалар бакчасы тө­зелгәч, аңа җи­тәкчелек итүне Тамара Яшуковага ышанып тапшырганнар.  Бик зур әзерлек эшләре башкарылган, анда хуҗалыкчыл һәм оештыра белүче Тамара  Нико­лаевнаның тагын бер сәләте ачылган. 2002 елда “Әкият” балалар бакчасын ачу тантанасында (исемне мөдир үзе уйлап тапкан) район мәгариф бүлеге начальнигы Җәүдәт Хәсәнов Яшукованы тәкъдим итеп, болай дигән: “Ягымлы һәм көчле”.  

Тамара Николаевна сабыйлар, ата-аналар, педагогия коллективындагы фикердәшләре белән бердәмлектә балалар бакчасында мөдир булып 20 ел хезмәт куйган.
– Балалар бакчасы базасында мәк­тәпкәчә яшьтәге балаларга экологик тәрбия бирү буенча рес­публика ресурс үзәге булдырылды. “Әкият” күп еллар дәвамында яшел флагка ия булды, ул “Эко-мәктәп/Яшел флаг” халыкара программасы буенча уңышлы эшләүче мәгариф оешмаларына бирелә. Балалар бакчасы күп тапкырлар респуб­лика конкурсларында җиңде. “Иң яхшы билингваль балалар бакчасы” республика смотр-конкурсында җиңеп, миллион сумлык грантка ия булды. Аннан соң “Балалар бакчасында белем бирү процессын иң яхшы оештыручы” конкурсында чираттагы җиңү – 500 мең сум отып алынды. “Ел балалар бакчасы”, “Эколидер”, “Мәктәпкәчә белем бирүдә иң яхшы инновацион технологияләр”, “Матур мәктәп” кебек конкурсларда беренчелекне алдык. Безне бөтен Россия­дә беләләр, – дип горурланып сөйли Тамара Николаевна. – Балачак дигән менә шундый искиткеч илдә мин эшләмәдем һәм яшәдем.

Барысына да ничек өлгерде икән, дигән сорау туды миндә әңгәмәбез барышында. Ике чакырылыш район Советы депутаты, “Атлантида” вокаль ансамбле җитәкчесе...

– Ирем Саша мине һәр нәрсәдә һәм һәрчак ­хуплады. Ә улым Паша белән аның ­хатыны юбилеема оныгым Есенияне бүләк иттеләр, – ди ягымлы елмаеп Тамара Николаевна. – Гаиләм, балаларым, оныгым һәм... күңел тынычлыгы – хатын-кыз бәхетенең иң мөһиме шулар.