Чәчү – акча эшләп алу вакыты

(Тәтеш, 5 июнь, “Тәтеш таңнары”). 

Килдештән Андрей Вишняков “Авангард” авыл хуҗалыгы предприятиесендә 2015 елдан бирле механизатор булып эшли.

– Армиядә хезмәт ит­кәннән соң, төрле җир­ләрдә эшләдем. Туган җиремдә яхшырак, биредә йорт салдым, – ди Андрей ­Вишняков.

Механизатор кырда биш ел эш­ләгәннән соң, авыл хезмәтчәне  буларак, махсус дәүләт программасы буенча бер миллион йөз мең сум акча алган. Килдештә ике катлы йорт төзегән, анда хатыны, җиде яшьлек кызы һәм алты яшьлек улы белән яши. Андрейга эшендә хезмәт хакының, авансның вакытында биреп барылуы ошый.

– Әле тагын техника ­сынатмасын өчен иң мөһиме – запас частьлар алып кайтып торалар. Машиналар яңа, сирәк кенә ватылалар, – дип сөйли механизатор үзенең эше турында.
Аның эше иртәнге сәгать алтыда-җидедә, ә кышын сәгать сигездә башлана. Чәчү вакытында яллар бары тик яңгыр яуган чакларда гына булырга мөмкин.

– Һава торышы коры торганда, чәчү ике атна була – өч-дүрт көн ял итәбез. Аннары – кырга, печәнгә, төрле эшләргә чыгабыз, – ди Андрей Вишняков. 

Механизатор кыш айларында ял итә диярлек. Хәзерге вакытта да ял алыр­га була, әмма бу хезмәткәрнең мән­фәгатьләрендә түгел. Чәчү – акча эшләп алу вакыты.

– Хезмәтем ошый, кайда да эшләргә кирәк, әгәр эшләмәсәң, беркайда да түләмиләр, – дип сөйли Андрей.

Өлгермәгәндә, механизаторлар сменалап, кичке 6дан иртәнге 6га кадәр эшлиләр. Ул үз җирләренең һәр мет­рын бик яхшы белүен һәм күзен йомган килеш тә таба алуын әйтә. Сүз уңаеннан, җитәкчелек төнлә белән дә шулай ук хезмәткәрләрне кайгырта, басуга килеп тукландыралар.