Эш — беренче урында

— Әти-әниемә якынрак булырга теләдем, — ди Чулпан Таһир кызы.

Ул күп балалы гаиләдә иң кечкенәсе — бишенче бала булып үсә, әти-әнисенә ярдәм итәргә, һәрвакыт алар янында булырга тели. Тормышын медицина белән бәйләячәген балачактан ук белә. Аның апалары да, киленнәре дә — шәфкать туташлары, шуңа күрә һөнәр сайлауда икеләнүләр булмый.

Булачак ире Халит белән туган авылына кайтканда таныша. Егет күрше авылда яши булып чыга. Хәзер Минәевләрнең ике баласы бар — Рәдифә һәм Камил.

Чулпан Минәева кызының аның эзе буенча китүен һәм хәзер Казанда шәфкать туташы булып эшләвен горурланып сөйли.

Чулпан Таһир кызы үзе Тәтеш үзәк район хастаханәсенең инфекция бүлегендә шәфкать туташы булып утыз елга якын эшли.

— Минем өчен эш — беренче урында. Мин үз пациентларымны яратам, алар өчен һәрвакыт борчылам. Кеше нинди генә холыклы булмасын, минем өчен алар барысы да тигез. Хәтта ял көннәрендә дә пациентлар турында борчылам, хезмәттәшләремә аларның сәламәтлеге турында белешеп шалтыратам. Беренче чиратта эшеңне яратырга кирәк, һәм шул чакта синең барысы да килеп чыгачак! — ди Чулпан Таһир кызы.