Яшь педагогларның остазы

Мәрьям Минкина һөнәре итеп педагогиканы сайлый, аңа ул бүгенге көнгә кадәр тугры кала. 

Мәрьям Минкина Буа районының Кече Шыгырдан авылында туа. Ул Тәтеш ­педагогика учи­ли­щесын яхшы бил­геләргә тәмамлап, Казан дәүләт педагогика институтына укырга керә, аны да яхшы билгеләргә тәмамлый. Дипломлы белгеч Мәрьям Минкина педучилищеның ВЛКСМ комитеты сәр­катибе вазифасында эшли башлый, ә 1986 елдан аны математика укытучысы итеп күчерәләр.

Үз-үзен даими камил­ләштерүе, яңа белемгә омтылуы, хезмәттәшләре, укучылар белән аралаша белүе педучилище җитәкчелеге тарафыннан игътибарга алына һәм Мәрьям Абдулла кызын директорның укыту-методик эш ­буенча урынбасары итеп бил­гелиләр. Ә 2019 елдан алып ул – көл­лиятнең струк­тур под­разделение­се – кулланма квалификацияләр­нең күпфункцияле үзәк җитәкчесе. 

Мәрьям Абдулла кызы уку йорты үсешенә, Тә­теш районы мәгарифен мәгълүматлаштыруга си­зе­лерлек шәхси өлеш кертә. Аның турыдан-туры катнашында информатика өлкәсендә булачак укытучыларны өстәмә әзерләү кертелә, “Кулланма информатика” (тармак­лар буенча) белгечлеге ачыла. Тәтеш районының 44 башлангыч сыйныф укытучысы информатика өлкәсендә өстәмә әзерлек ала. Бу башлангыч сыйныфларның укы­ту ­программасына “Мәгъ­­лүмати техно­ло­гия­­ләр” модулен кертү мөм­кин­леген бирә.

Тәтеш педагогика училищесы базасында 2002 елдан башлап Татар дәүләт гуманитар институты вәкиллеге ачыла, анда Мәрьям Минкина директор урынбасары була. 

Мәрьям ­Минкина – мате­матика укыту­чы­ларының респуб­лика методик ­советы әгъ­засы, ­педагогика хез­мәт­кәрләрен аттес­тация­ләү буенча эшче төркем әгъзасы, һөнәри белем бирү оешмаларын аккре­дитацияләү буенча рес­публика эшче төркем әгъзасы.

Татьяна Адаева, Тәтеш дәүләт ­гражданнар­ны як­лау көллияте директоры:
– Мәрьям ­Абдулловна гомер буе укуын дәвам итә һәм “белем күп булмый”, дип саный. Аның төрле дәрәҗәдәге дистәләгән дипломнары һәм танык­лыклары бар. Ул безнең барыбыз өчен дә чын мәгънәсендә – һөнәрдә дә, тормыш буенча да укытучыбыз булып тора.

Мәрьям Абдулловна, укытучы буларак, укытыр алдыннан башта үз укучыңны яратырга кирәк, яратмыйча өйрәтеп булмый, дип саный. Математика өл­кәсендә үзенең компетентлы булуын ул ел саен махсус урта уку йортлары укытучылары арасында республика конкурсларында һәм олимпиадаларында призлы урыннар алуы белән дәлилли. Кагыйдә буларак, аның мәсьәләләрне хәл итү ­тө­ре хезмәттәшләре тарафыннан яхшы үрнәк буларак кабул ителә.
Мәрьям ­Абдулловна – ис­кит­кеч ­сыйныф җи­тәкчесе, ул биш төр­кем­не чыгарды, алар һәр­вакытта көллият буенча рей­тинг­ның беренче сафын­да булдылар. Аның барлык укучылары да диярлек алга таба югары белем алдылар. Педагогика төркемен тәмам­лау­чыларның күбесе мәктәпләрдә эшлиләр, шулай ук техник-программистларга IT-өлкәдә их­тыяҗ зур.

Мәрьям Абдулловна кайда ашыгыч рәвештә проблеманы хәл итәргә кирәк, һәрвакытта шунда. Ул яшь педагогларның да, җитәкче составның да остазы булып тора. Безнең хезмәттәшебез көллияттә генә түгел, республиканың педагогика җәмәгатьчелегендә дә ихтирам казанды.

Мәрьям Минкинаның  мәгариф өлкәсендәге күпьеллык нәтиҗәле хезмәте төрле дәрәҗә­ләрдә югары бәяләнде. Ул Россия Федерациясе Мәгариф һәм фән министрлыгының “Россия Федерация­сенең урта һөнәри белем бирүнең мактаулы хезмәткәре” күкрәк билгесе, Татарстан Республикасы Мәгариф министрлыгының “Мә­га­рифтәге казанышлар өчен” күкрәк билгесе бе­лән бүләкләнде, “Татарстан Республикасы урта һөнәри белем бирүнең иң яхшы укытучысы” һәм “Татарстан Республика­сы урта һөнәри белем би­рүнең иң яхшы методик хезмәте җитәкчесе” грантларына ия.

фотоны Мәрьям Минкина тәкъдим итте