Киң күңелле Ваһаповлар

Ул Бидәңге авылында туып-үсә, шунда мәктәпне тәмамлый. Яшьлек елларын гаилә тормышы алыш­тыра. Ил­гиз абый хатыны Фә­ния апа белән 47 елдан бирле тигез­лектә гомер кичерә.  Ва­һа­повлар икесе дә җир­ле авыл хуҗалыгында фидакарь хезмәт куйганнар, бүгенге көндә инде алар лаеклы ялда. Гаилә пары ике бала тәр­бияләп үстергән, хәзер алар­ның үз гаиләсе. Менә шулай, тормыш мәгънә­сен кешеләргә кирәк булып яшәүдә, игелекле эшләр кылуда күргән Ваһа­повлар гаиләсе кечкенә шат­лыкларга да сөенеп, җир­лек­тәге башкарылган ­эш­ләр­дән күңел ләззәте алып, гаилә ты­н­ыч­лыгына, бала­ла­рының уңыш­ларына сөенеп, оныклар шат­лы­гына күмелеп, тормыш йомгагын сүтәләр.

– Бәхет ул беркайчан да күк­тән төшми. Һәркем бәхетен үзе таба. Үзең тапкан бәхет кадерле, диләр бит. Ә без балаларыбыз белән бәхетле. Аларга кирәк булып яшәүдән көч алабыз, – ди­ләр Илгиз абый белән Фәния апа.

Әлбәттә, гаилә нигезе нык булганда гына яхшы эш-гамәл­ләр кылып, үзеңнең башкаларга кирәк булуыңны тоеп яшәргә була. Илгиз абый  Ваһапов – нәкъ тә моның матур үрнәге.Ул тынгысыз, һәр нәрсәгә таләпчән, игелекле кеше. Ә Фәния апа, ба­кырчы­лылар әйтүенчә, авыл­да оештырылган чаралар­да матур итеп җырлап, илаһи моңлы тавышы белән күңелләргә рухи ял өстәүче. Әле тагын өздереп гармунда да уйный, кирәк чакта авылдаш­ларын рәхәтләндереп татар көй­ләренә дә биетә. 

–  Авылдашыбыз Илгиз абый Ваһапов бик ярдәмчел кеше. Нинди генә гозер белән барсаң да, ул кире борып җибәрми, беркайчан да “юк” дип әйтми. Авыл кырыенда чишмә ясау турындагы эшләрне язып та чыккан идегез, аны бездә Илгиз чишмәсе дип тә йөртәләр. 

Ул авылыбыздагы суның тәэмин ителешенә бик мө­киббән китә торган кеше. Өченче елны яңа суүткәргеч урнаштырганда, чат саен люклар куеп калдырдылар, алай-болай төзексезлекләр килеп чыкса, шул люкны ачып, кай урында җимерелгән булса, шуны ясар өчен дип. Аларга яңгыр, кар сулары агып тула, анда һич кенә дә төшеп булмый торган кыен хәл килеп чыкты. Шул чакта Илгиз абый бик бор­чылып йөрде, җитәк­челеккә мөрәҗәгать ­ит­те һәм җирлек башлыгы Илдар Шәмсетдинов шул урынны трактор белән казыт­тырды. Аннары Илгиз абый шунда барып берүзе ике көн буе шактый эшләр башкарды. Илдар Мәхмүтгәрәй улы шунда куяр өчен торбалар белән тәэмин итте. Аны бер­ничә кеше җыелып урнаш­тыр­дылар. Хәзер инде люкка су тулса, шуннан ачалар да, төзексезлекне җайга салалар. Шулай итеп авы­лның су белән булган вәзгыяте җайга салынды. 

Җир­лекнең төзеклегенә янып-көеп йөргән авылда­шыбыз Илгиз Ваһапов олы хөрмәткә лаек. Ул миһербанлы, мәрхә­мәтле, ярдәмчел кеше, – дип уртаклаштылар Бакырчы кешеләре. 

Авыл халкы әйтүенчә, Ил­гиз абыйның тагын бер иге­лекле эше – ул авыл буасын төзекләндерү. Әлеге сулыкта кайчандыр казлар, үрдәкләр  йөзгән. Хәзер дә төшкәлиләр икән, ләкин бик сирәк. Бу күл җәен балаларның балык каптырырга ярата торган урыны да булып тора. Илгиз абый бу буага үрчетер өчен күп итеп балыклар да җибәргән. Кайчагында әле олы кешеләр дә ял итәр өчен кармакларын алып шунда төшеп утыралар икән. Менә шул буаның бер кырыеннан су агып торуын күргән Илгиз абый, әлеге дә баягы тагын хафага төшкән. Дөньяда нинди генә хәлләр булмый, Аллам сакласын, ут-күзеннән, су һәрчак булырга тиеш дип саный ул. Тынгысыз ир-ат җирлек башлыгы бе­лән уртаклашкач, кабат эшкә алынган. Торбаның аскы ягын берүзе казыган. Икенче көнне Ил­дар Мәхмүтгәрәй улы аңа булышырга кеше җибәргән һәм аның белән алар икәүләп ташлар алып кайтып, бетонлап ясап та куйганнар. Инде буа­ның суы китми икән хәзер. Икенче елга инде күп иттереп су җые­лып, тагын үрдәкләр, казлар йөзәргә насыйп булсын, диләр бакырчылылар.   

Боларга нәтиҗә ясап шуны әйтәсе килә, игелек кылу – ул һәркемнең йөрәгеннән чыккан күңел халәте. Шулай да бу дөньяда барыбызның да яхшы гамәл­ләр башкару өчен зур мөм­кин­леге бар, бары тик теләк кенә кирәк.  

фотолар газета архивыннан