Клавдия Пронина һәркемнең күңеленә ачкыч таба белгән

(Тәтеш, 22  март, “Тәтеш таңнары”, Динә Мансурова).

Сайлаган юлына тугры, кешеләргә игелекле һәм белем бирүче, шәһәр һәм район вакыйгаларыннан һәрдаим хәбәрдар булучы, эше өчен янып-көюче – боларның барысы да аңа туры килә. Клавдия Федоровна 43 ел дәвамында китап культурасын саклаучы булган. 
Ул 1954 елда мәктәпне тәмамлаганнан соң, Монастырский авылы китапханәсенә мөдир булып эшкә урнаша. Китапханә техникумында укып, белгечлек ала. 1959 елда үзәк китапханәнең уку залы мөдире була. 

Клавдия ­Федоровнаны 1978 елның ноябрендә үзәк китапханә системасы ­директоры итеп билгелиләр. Район китапханәләрен үзәк­ләштерү буенча аның тарафыннан зур эшләр башкарылган. Үзәк китапханә сәяси кичәләр, яшьләр белән әңгәмәләр кебек, шундый эшләрнең башлап йөрүчесе була, мәнфәгатьләр  буенча оештырылган ­клуб­лар киң ­танылу алган.

Бу еллар эчендә күпме кызык­лы, эчтәлекле, кичерешләргә бай чаралар үткәрелүен санап бетерү мөмкин түгел. Фикердәшләрдән  торган  зур коллектив үзенең директорын барлык башлангычларда да хуп­лаган. Китапханәчеләрнең алдынгы тәҗрибәсе, абруе үсеш алган. Клавдия Федоровна үзенең хезмәткәрләренең һөнәри укуына зур игътибар бүлеп биргән, аларның иҗади хезмәтләрен бүләкләгән. Тәҗрибә уртаклашу максатыннан китапханәләр базасында күрсәтмә чаралар, семинар-киңәшмәләр үткәрелгән, алар матур гадәт булып калганнар һәм безнең көннәрдә дә уза. Клавдия Федоровна әйтүенчә, “бу исәп-хисап та, контроль дә, эшләр өчен этәргеч тә”.

Ул лаеклы ялга чыгар алдыннан соңгы биш елда үзәк­ләштерелгән китапханә сис­темасы директорының балалар белән эшләү буенча урынбасары булган. Үзенең барлык иҗади планнарын кадерле булган кешеләренә – хезмәттәшләренә тапшырган, алар өчен ул югары профессиональлек үрнәге булган һәм шулай булып кала да.

Хезмәттәшләре аның йөрәк җылысын, ышанычлылыгын һәм аның белән эштәге проблемаларны гына түгел, шәхси һәм гаиләдәге шатлык-куанычларны да уртаклашырга мөмкин булганлыгын искә алалар. Клавдия Федоровна һәр кешенең күңеленә ачкыч таба белгән, ә аның тормыш тәҗрибәсе, көч-кодрәте, яхшы киңәшләре һәркем өчен зур әһәмияткә ия булган.

– Ул һәрвакытта дөреслекне яратты, намуслы булды һәм безне дә шуңа өйрәтте. Киң күңелле иде, – дип уртак­лаша Алабирдедән китапханә хезмәте ­ветераны Рәшидә Шәрәфиева.

– Клавдия Федоровна китапханә эшенең остасы гына түгел, ә ышанычлы дус та, искиткеч әни дә, әби дә! Менә дигән хуҗабикә! Тыйнак хатын-кыз! Ни аяныч, җирдә аның кебек кешеләр аз! – ди хезмәттәше Галина ­Харитонова.

Татарстан Республикасының атказанган мәдәният хез­мәт­кәре Клавдия Пронинаның хезмәте төрле дәрәҗәдәге бүләкләр белән билгеләп үтелгән. 1988 елда аның исеме Татарстан Республикасының Мактау ­китабына кертелгән. 

Китаплар белән эшләү шатлыгы аның йөрәгендә гомер буена җитәрлек эз калдырган. Клавдия Федоровна бүгенге көндә дә әйләнә-тирәдәгеләр күңелендә китапка карата зур хөрмәт, мәхәббәт уята, тирә-юньдәгеләргә рух күтәренкелегенә, уңышка көч-куәт өстәүгә зур йогынты ясый.