Льяштә иҗади рух яши

Гөлнара Зәки кызы Алабирде авылында туа, күп балалы гаиләдә үсә.

– Мәктәпне тәмамлаганнан соң педагогика училищесының физкультура бүлегенә укырга кердем. Бу сайлавым очрак­лы түгелдер, мөгаен: мәктәп елларыннан ук спорт белән шөгыльләнергә яраттым, чаңгы ярышларында уңышлы чыгыш ясадым, волейбол секциясенә йөрдем.

Хезмәт юлым Монастырский мәктәбендә татар теле укытучысы булып башланды. Аннары Льяш мәктәбенә күчтем, ә ул ябылгач, Олы Бисәр мәктәбенә эшкә бардым, биредә физкультура һәм татар теле дәресләрен укыттым. Татар һәм чуваш теле охшаш, шуңа күрә балалар өчен бу фән артык катлаулы булмады, ә инде физкультураны барлык сабыйлар да ярата иде, – дип сөйли Гөлнара Зәки кызы. 

Һәм менә ун елдан бирле инде ул Льяш авылында мәдәният йорты мөдире булып эшли, Шәрәфиевлар гаиләсе шунда яши.

– Хезмәттәшләрем Ямбактыдан Ольга Григорьевна Земкова, Олы Бисәрдән Галина Владимировна Курмышкина эшчәнлегемнең башлангычында үз тәҗрибәләре белән уртак­лаштылар. Район мәдәният йорты методистлары да зур ярдәм күрсәттеләр, киңәшләрен бир­деләр. Мин әзерләгән иң беренче чара – Әниләр көненә багышланган иде. Ял көнне без авылдагы әниләрне кунакка чакырдык, балалар концерт куйдылар, чыгышлар бик дулкынландыргыч булган иде, – дип искә ала авылның мәдәният йорты директоры. 

Авылда халык күп булмаса да, мәдәният учагына элеккечә ихтыяҗ зур.

– Безнең бердәм фикердәшләр­ коллективы тупланды. Лилия Георгиевна Седугина, Анастасия Егоровна Мочалова, Наталья Александровна Лукоянова клуб эшендә күп еллар дәвамында активлык күрсәтәләр.

Узган елның декабрендә без “Иң яхшы мәдәни-ял итү учреждениесе – 2025” район смотр-конкурсында “Иң яхшы теат­раль куелыш” номинациясендә хәрби-патриотик тематика буенча спектакль куеп, уңышлы чыгыш ясадык. Конкурста җиңгән өчен акчалата сертификат тапшырдылар, бу акчага музыкаль колонка сатып алдык. Үткәргечсез аккумуляторлы техника бик уңышлы булды, без аны Яңа ел бәйрәмнәрендә урамда кулландык.

Урамны Яңа елга бизәү өс­тендә дә яхшы эшләдек – ат белән чананы минем  укучым Владимир Эккемеев ясады, ул рәсемне бик яхшы ясый, ә гирляндалар белән ясалма ялтыравыкларны үзем элеп чыктым, барысы да бик матур һәм җәлеп итәрлек килеп чыкты. Нәтиҗәдә, авыл җирлекләре арасында административ биналарның һәм янәшәдәге территорияләрнең иң яхшы бизәлеше буенча район конкурсында беренче урынны алдык һәм мәдәният йорты ихтыяҗлары өчен акча эшли алдык, – ди елмаеп Гөлнара Шәрәфиева.
Иң яхшы мәдәният йортла­рының беренче район конкурсында җирле артистлар, рус халкының гореф-гадәтләренә аерым игътибар биреп, фоль­к­лор аулак өйләрдә утыруларны тәкъдим иткәннәр. Сәнгать җитәкчелегендәге “Задорушка” вокаль коллективының чыгышы сценарийның бизәге булган.

– Безнең төркемнең нигезен биш кеше тәшкил итә. Репертуарны бергә сайлыйбыз, җырлар өйрәнәбез, репетицияләр ясыйбыз, аралашабыз. Без башкарган җырларны тамашачылар һәрвакыт җылы кабул итә, – дип белдерә Гөлнара Зәки кызы.

Гүзәллек тудыручыларның иҗади уйларын тормышка ашыру өчен “Уңган куллар” тү­гә­рәге эшли. Теләге булучылар анда сәйлән үрү белән шөгыльләнәләр, төрле материаллардан башка төрле кул эшләнмәләре ясыйлар.

Клуб эшенең активистлары, нинди яшьтә булуларына карамастан, махсус хәрби операциядә катнашучы сугышчыларыбызга ярдәм итү өчен авылның мәдәният йортына киләләр. Алар окоп шәмнәре ясыйлар, гуманитар ярдәм җыялар. Мәдәният йорты директоры Яңа ел бәйрәмнәрендә эштән бушаган арада, килүчеләр булмаганда, солдатлар өчен оекбашлар бәйләгән.

– Үз эшемдә авылдашла­рым­ның мине хуплавына шатмын. Аларның кызыксынуы һәм иҗади омтылышы нәтиҗәсендә без нәрсәгә сәләтле икәнебезне күрсәтә алабыз. Һәр уңышлы чыгыш зур хезмәт таләп итә һәм минем артистларым сынатмыйлар: армый-талмый репетицияләр ясыйлар һәм югары бәя алалар. Мин алар белән горурланам, – ди район мәдәният системасының тәҗрибәле хезмәткәре.