Льяштән Елена Ахтонова җирле үзидарә органнарында 37 эшләгән

(Тәтеш, 20 апрель, “Тәтеш таңнары”). 

Елена Александровна әйтүенчә, ул инде күптән лаеклы ялда булса да, хез­мәттәшләре белән әлегә кадәр элемтәдә тора.

– Авыл Советында без 12 хатын-кыз эшләдек, – ди ул. – Күрешкәндә үт­кән­нәрне рәхәтләнеп искә төшерәбез, чөнки семинарларда, башка чараларда еш очраштык, тәҗрибә уртак­лаштык, бер-беребезгә ярдәм иттек. Эш күләме зур, һәрвакыт халык арасында булдык – йә сәяси укулар  үткәрдек, йә басуда, трактор паркында, фермада чыгыш ясадык, чәчү өстендә һәм урып-җыю вакытында – шулай ук кырда идек. Безнең колхоз –  “Октябрьгә 13 ел”, ан­нары “Октябрьгә 50 ел” дип аталды, эшчеләр күп иде, иген үстерделәр, терлекчелек, дуңгызчылык белән шөгыльләнделәр, җитештерү күрсәткечләре буенча хуҗалык районда алдынгылар рәтендә булды. Социаль инфраструктура – ФАП, кибет, мәктәп, мәдәният учреждениесе эшчәнлеге дә кайбер мәсьәләләрне хәл итүне таләп итте, һәркайда тәр­тип һәм тиешле шартлар булырга тиеш.   

Җирле үзидарә ветераны үткәннәрне искә алганда, продукция сатып алу планын үтәүләре, йорт хуҗалыкларыннан ит, йон,
йомырка җыюлары, Тә­теш бәрәңгесен баржалар белән Әстерханга төяп җибәрүләре хакында сөйли.

– Миндә Красная Поляна, Олы Бисәр, Ямбакты һәм Льяш авылы иде, төп өч авылда 800гә якын кеше яшәде, барысын да танып белә идем, – ди Елена Александровна үткәннәр хакында уйланып. – Ул вакытта транспорт булмады, нигездә, барысын да җәяү йөреп чыктым, торак пунктлар буенча эшләгәндә, атларга утырып бардык, һава торышы начар чакта – тракторда. Барысын да тиешенчә башкардык, йөкләнелгән эш өчен җаваплылык хисе зур булды, ярдәмләшү һәм максатка омтылу теләгән нәтиҗәләргә ирешергә мөм­кинлек бирәсен аңлап, һәр нәрсәне бергәләп эшләдек.

Колхозда шофер, тракторчы булып эшләгән ире Юрий Александрович бе­лән Елена Александровна 52нче ел инде бергә, иңгә-иң куеп гомер кичерәләр, аларның ике бала, дүрт оныклары бар. Ахтоновлар әйтүенчә, хәзерге вакытта алар өчен иң мөһиме – тынычлык, иминлек, туганнары һәм якыннарының сәламәт булуы.