Минскида тәҗрибә узалар

Яшьләр хезмәт куя торган күпсанлы юнәлешләр арасында Минск трактор заводында өченче тапкыр оештырылган “Трактор төзүче” проекты да бар. Быел ул Белоруссия Республикасының югары уку йортларыннан, шулай ук Казан дәүләт аграр университетыннан 85 егет һәм кызны җыйды. Студентлар отряд профиленә һәм куелган бурычларга карап, цехларда, торак-коммуналь бүлектә, җәмәгать туклануы комбинатында эшлиләр. Әмма барысының да омтылышы уртак – каникулларны файдалы  уздыру һәм, әлбәттә, акча эшләү.  

Быел Казан дәүләт аграр университетыннан 20 студент һөнәри тәҗрибә алырга барган, алар ике отряд – “Алга” һәм “Татарстан” булып оешкан. Студентлар арасында беренче курс студенты, тумышы белән Үтәмештән Рәзил Измайлов та бар. Егет күңелле белән файдалыны берләштерергә булган – тагын әле сәяхәт итәр өчен дә, производство тәҗрибәсе урыны итеп Белоруссияне сайлаган.    

– Эш әллә ни авыр тү­гел, мин барысына да тиз өйрәндем, һәм эшләү сыйфатын да көннән-көн яхшырта барам. Баштарак смена барышында аяк өстендә бу­лу авыр иде, әмма хәзер инде күнектем. Мин – икенче разрядлы МСР слесаре. Башкарган хезмәтем – тракторларга арткы һәм ян рамнар җыю һәм урнаштыру. Шулай ук мин “Татарстан” студентлар җитештерү отрядында катнашучы булып торам, һәм эштән буш вакытларда без проект җитәкчеләре үткәрә торган төрле конкурсларда, чараларда катнашабыз. Ә ял көннәрендә без Минскиның бар матурлыгын күреп калу өчен шәһәргә чыгарга тырышабыз, – ди Рәзил. 

“Трактор төзелеше” сту­­­дентлар хезмәт отряды үз эшен август ахырында төгәлли. Хезмәт көн­нәреннән тыш, егет-кызлар өчен бай эчтәлекле мәдәни программа оештырылган. Алар башкала театрларына һәм кинотеатрларына, музейларга баралар, отрядлар арасындагы спорт ярышларында, иҗади бәйгеләрдә катнашалар. Ләкин, иң мөһиме, әлеге вакытлар алар күңе­лендә озак сакланачак һәм бары тик иң күңелле хатирәләр генә ­калачак.

фото предоставлено студентческим производственным отрядом «Татарстан»