Профилактика һәм күзәтчелек гомерне саклап калырга булыша

(Тәтеш, 20 октябрь, “Тәтеш таңнары”). 

ТР буенча Роспот­ребнадзор Идарәсенең Тәтеш, Буа, Апас һәм Чүпрәле районнары территориаль бүлеге баш белгече Мария Матвеева хәзер дә, хезмәт эшчәнлеген ­башлап җибәргәндәге кебек, эшкә иртәнге 7дә килә, гәрчә эш көне 8дән ­башланса да.

– Мин Тәтештә тудым, шәһәрдәге 1нче мәктәпне тәмамладым, медицина институтына укырга ке­рергә уйладым, ләкин беренче елда керә алмадым, шуңа күрә документларны Казанның медицина училищесына тапшырдым. Аны кызыл диплом белән тәмамладым, шуннан соң Брежнев шәһә­ренең (хәзерге Яр Чаллы) ашыгыч медицина яр­дә­ме хастаханәсендә, токсикология бү­леге ла­бораториясендә фельд­шер-лаборант булып эшләдем, – дип сөйли Мария ­Ивановна.
Бер елдан соң ул үзенең хыялын тормышка ашыра: медицина институтының санитария-гигиена факультетына укырга керә һәм, һөнәр алып, Тәтешкә кайта.
 – 1994 елның авгус­тында Дәүләт санитария-эпидемиология хезмәте үзәгенә балалар һәм яшүс­мерләр гигиенасы буенча санитар табиб булып урнаштым. Ул вакытта коллектив зур иде, бердәм эшләдек, белгечләрнең эшчәнлек өлкәсе бүленгән иде. Мәктәпләр, балалар бакчалары, җәйге ял лагерьлары минем объектларым иде, – дип искә ала Мария Ивановна.

Бүген, дистә ­еллар элек булган кебек, ул про­фи­­­лактик чаралар һәм Тә­теш районы предприя­тиеләрендә санитар күзәт­челек белән шөгыль­ләнә. Тәтеш районына Рос­пот­реб­надзордан бары тик ике белгеч: Мария Ивановна һәм территориаль бүлек начальнигы урынбасары Олег Мазюкин.
– Әлбәттә, кешеләр башта безнең күрсәтмәләргә каршы киләләр, әмма күп­ләр моның кирәклеген аң­лый. Әйтик, 90нчы елларда кайбер балалар бакчаларында хәтта су да юк иде.

Күрсәтмәләребездән соң хокук бозулар бетерелде, ә аннары безгә хәтта хез­мәткәрләр дә рәхмәт әйттеләр, чөнки аларның хезмәт шартлары яхшырды, – дип уртаклаша Мария Ивановна.
Коронавирус пандеми­ясе башлану белән Рос­потребнадзор белгеч­лә­ренең бурычлары арткан. Беренче вакытларда алар тәүлекләр буе эшләгәннәр. Район территориясенә ке­рү­челәрне карантинга җи­­бәрергә кирәк булган. Бу хакта боерыкны алар шәхсән таратканнар. Шул рәвешле табиблар эшен җиңеләйтә ­алганнар.

– Инфекция тиз тарал­ды. Күпләр ковидның барлыгына ышанмады­лар, вакцинациянең нәти­җә­лелегенә шик­лән­деләр, – дип билгеләп үтә Мария Ивановна.

Бу безгә, гади кеше­ләр­гә, Роспотребнадзор хез­мәткәрләренең эш­чән­леге си­зелми, шул ук вакытта аның артында йөзләгән кот­карылган кеше гомере тора. Пандемия чорындагы бел­гечләрнең эшен рес­публика җитәкчелеге югары бәяләгән: Олег Мазюкин һәм Мария Матвеева “ТРның атказанган таби­бы” исеменә лаек ­булганнар.