Роза Горохова: “Мин Интернет белән дус”

(Тәтеш, 16 апрель, “Тәтеш таңнары”, Галина Таҗетдинова). 
Аңа башка кешеләр белән аралашу балачактан ук ошаган, ә мәк­тәп елларында өч уку йортында: үз җирлекләрендәге авыл мәктәбендә, Кошки-Новотимбаево һәм Тәтешнең 2нче урта мәктәбендә укыган.

Роза Фәһим кызы әйтүенчә, яшь чагыннан ук дуслары күп булганы өчен, ул язмышына рәхмәтле. Хатын-кыз игелекле һөнәр – медицина хезмәткәре белгечлеген сайлаган.

Училищены тәмамлагач, юл­ла­­ма буенча Свияжскига җи­бәрелгән, психиатрия хаста­ха­нәсендә 15 ел шәфкать туташы булып эшләгән. Шул якларда ул үзенең гомерлек парын – шулай ук табиб булып хезмәт куючы Владимир Сергеевичны очраткан. Яшьләр гаилә корганнар, сабыйлары якты дөньяга аваз салган. 

Вакытлар узу белән, ­язмыш шулай язгандыр, ­Гороховлар Ро­за ханымның кече ватанына кү­ченгәннәр, анда бик тиз күне­геп киткәннәр, эшкә урнашканнар, йорт хуҗалыгы булдырганнар.

– Авылда мәдәният йорты директоры булып 20 елга якын эшләдем, – ди Роза Фәһим кызы. – Халык күп, яшьләр актив иде. Педагоглар белән хезмәттәшлек иттек, укучылар барлык чараларда бик теләп катнаштылар. Һәрвакыт тәҗрибә уртаклашырга бардым, Келәштән безгә концерт күрсәтергә килделәр, без үзебез Түбән Тарханга бардык, спорт ярышлары үткәрдек, тирә-юньдәге авылларда концертлар куйдык. Авылыбыздагы өлкән яшьтәгеләрнең дә төрле чараларда теләп катнашуы сөендерә иде. Яшьләр үзләренең кече ватаннарына карата мә­хәббәт хисләрен булдырырга тырыштылар, аларны танылган якташлары үрнәгендә туган якларының кадерен белергә, тагын да яхшырак итәргә омтылу үсешенә өйрәттеләр.

Механизаторларга, иген­челәргә ярдәм итү өчен кырга чыкканнар, авыл кешеләре арасында әңгәмәләр, яшьләр өчен викториналар, ярышлар үткәргәннәр. Мәдәният хезмәткәре, штаттан тыш хә­бәрче буларак, боларның барысы хакында да “Тәтеш таң­нары” газетасына хәбәр итеп, авылдашлары – туган җирендәге хезмәтчәннәр, аларның казанышлары, үрнәк гаиләләр турында язган. 

Роза Фәһим кызы хәзерге вакытта да, лаеклы ялда булса да, иҗаттан аерылмый. Мисалга, күптән түгел район күләмендә оештырылган онлайн шигырь сөйләү марафонында катнашкан. Аның шигырьләрне туган телендә сәнгатьле, кү­ңелгә үтеп керерлек итеп сөй­ләве социаль челтәрләрдә бик күп җылы фикерләр уяткан. 

– Мин Интернет белән дус, – ди Роза ханым, – заман белән бергә атларга тырышам. Тормыш барлык юнәлешләрдә дә кызыклы, әдәбият, шигърият, аш-су рецептлары карыйм, дуслар белән аралашам, блогерларга кушылдым.  
Кырык биш ел бергә гомер иткән Гороховларның дүрт онык­лары бар, әби-бабасы аларны үзләрендә шатланып каршы алалар, шулай ук үзләре дә туганнарының барып хәлен белергә яраталар. 

Гороховларның өлкән буы­нының балалар ярдәмендә илебез буйлап кына түгел, шулай ук чит илләрдә дә ял итү мөмкинле­ге бар.
 – Аллаһ биргәнне кадерләргә кирәк, – ди Роза Фәһим кызы, – барысы да исән-сау, дөньялар тыныч булсын иде.

фото Гороховлар гаилә архивыннан