Шәһәрле Галина һәм Геннадий Иотовлар 50 ел бергә

(Тәтеш, 7 сентябрь, “Тәтеш таңнары”).  Галинаның ахирәте аңа шәһәр­дәге “Октябрь” кино­театрына фильм карар өчен махсус билет сатып алган, ләкин янәшәсендәге урындыкта яшь егет утырачагын әйтмәгән. Янына төз, озын буйлы чибәр егет килеп утыргач, кыз бик нык гаҗәпләнгән. Фильмның башыннан ахырына кадәр ул бик кыенсынып кына утырган, һәм ут кабынгач ук ашыгып ишеккә йөгергән, егет аның артыннан омтылса да, җитез кызны куып җитә алмаган. Юкка гына халык телендә, язмыштан качып булмый, дип әйтмиләр шул, шулай килеп чыккан да – Геннадий чибәр кызны барыбер үзенә ­караткан.     

– Авылда беренчеләр рәтен­дәге егет иде, – ди елмаеп Галина Пет­ровна. – Өстәвенә, аның хезмәт сөючәнлеген, куллары алтын, әтисе балта остасы икән­леген, ә гаилә тормышы өчен мондый сыйфатларның һәрчак мөһим булуын белә идем. 

Яшьләр башта иренең әти-әнисе йортында яшәгәннәр, аннары үз гаиләләре өчен йорт төзи башлаганнар. Моның өчен алар никадәрле тырышлык куюларын үзләре генә беләләр, барысын да үз куллары белән эшләгәннәр.

– Ул искиткеч кеше, аның төп хезмәт стажы җиһазлар ясау фабрикасында эшләгән елларга туры килде, – дип сөйли Галина Петровна. – Өйдә дә аның остаханәсе бар, ул аның шәхси мохите һәм тулысынча иҗат белән хозурлану урыны. Күршеләрнең күбесе аңа ярдәм сорап мөрәҗәгать итәләр, һәм ул беркайчан да кире какмый.

Галина Петровна 26 ел район­ның мәдәният тармагында эш­ләгән. Аның әйтүенчә, заман белән бер адымда атлау өчен һәрвакытта белемен үстергән. Ул үзе белән эшләүчеләрнең барысын да хөрмәт белән искә ала.

Хәзер дә әле, лаеклы ялда булса да, ветераннарның халык хорында катнаша, иҗтимагый эшчәнлек белән шөгыльләнә.
– Өлкән буын кешеләренә хөрмәтем зур, аларга Бөек Җиңүне яулап алулары өчен рәхмәт. Мин әти-әниемнең традициясен дәвам итәм, алар да хорда чыгыш ясыйлар иде, – ди әңгәмәдәшем.

Балалары Иотовлар гаиләсе өчен шатлыклары булган, ә хәзер оныклары әби белән бабай янында  еш кунак булалар, ә өлкәннәр яшьләр өчен зирәк киңәшчеләр һәм остазлар булып торалар.

Гаилә бәхетенең сере турында сөйләшкәндә, алтын юбилярлар тугрылыкка һәм намуслылыкка басым ясыйлар.

– Күп нәрсә хатын-кызның зирәклегенә, сабырлыгына бәй­ле, – дип ассызыклый Галина Петровна. – Ике кеше бергә яшәгәндә – бу үзе үк инде икенче халәт. Бәхет күктән төшми, аны бергәләп булдырырга, бөтен кыенлыкларны кичерергә кирәк. Безнең гаиләдә төрлесе булды, барысын да үткәреп җибәрдек. Гаиләне саклап калыр, киләчәк турында уйлар һәм бергә яшәр өчен барысын да эшләргә кирәк.