Владимир Корсаков: “Барысын да үз кулларым белән эшләргә яратам”

(Тәтеш, 26 октябрь, “Тәтеш таңнары”).

Олы Шәмәк авылында туган Владимир Корсаков җәйге каникул вакытында колхозда 11 яшьтән эшли башлый, ә мәктәптән соң Тәтеш автомотоклубына машина йөртүче булып укырга керә.

Машина йөртү таныклыгы алгач, егет колхозга шофер булып урнаша, төрле йөк ташый, һәм аның сүзләренчә,  “Победа” колхозында шофер булып эшләве белән ­горурлана.

Армиядә хезмәт иткәннән соң, өенә кайткач, авылда һәрвакыт ихтыяҗ зур булган ветеринария табибы белгечлеген алырга була. Студент яхшы укый һәм эшкә дә урнаша.

Владимир Григорьевич үзенең кече ватанында бер ел гына ветеринария табибы булып эшли, аннары Тәтеш ветеринария станциясен җитәкли. Шуннан Олы Тархан участок ветеринария хастаханәсендә эшли, Тәтеш ит-кошчылык комбинатында директор була, анда үз көчләре белән капремонт үткәрәләр, дуңгыз фермасы оештыралар, суыткыч төзиләр.

Берничә елдан Владимир Корсаков КПСС райкомы секретаре, аннары беренче секретарь була. Шуннан соң аңа Тәтеш ПМК-29ны җитәкләргә тәкъдим итәләр. Предприятие белән җитәкчелек иткән елларда район авылларында газ, су белән тәэмин итү челтәрләре төзү буенча зур эшләр башкарыла. Тәтеш юл идарәсе начальнигы буларак, предприятиенең җитештерү базасын төзүдән һәм үстерүдән тыш, ул кешеләрне торак белән тәэмин итәргә ­омтыла.

– Коллектив турында кайгыртыр­га кирәк, – ди Владимир Григорьевич. – Юлда эшли башлагач, кыр кухнясы оештырдым, көнгә өч тапкыр эшчеләрне бушлай ашаттык, ә эштә тоткарлансалар – дүрт тапкыр. Барлыгы үз эшчәнлегем дәверендә предприятиенең үз акчасына төзелгән торак белән 50дән артык гаиләне тәэмин итә алдым. Асфальт-бетон җитештерү 3 елда 3,5 тапкырга артты. Кешеләр лаеклы яшәсен өчен яхшы хезмәт хакы түләргә тырыштым.

Хәер, аның тырышлыгы да югары җитәкчелек тарафыннан лаеклы бәя­ләнгән – аның сүзләре буенча, пред­прия­тиенең җитештерү эшчән­легендәге уңышлары өчен Владимир Корсаков яшәгән Вахитов урамына рәхмәт йөзеннән асфальт-бетон юл салынган һәм ул шәһәр халкына ике дистә ел хезмәт иткән.

Яңа гасырда шәхси эшмәкәр буларак, Владимир Корсаков автомобиль юллары, терлекчелек комплекслары төзүне дәвам итә, утын әзерләү белән шөгыльләнә.
– Барысын да үз кулларым белән эшләргә яратам, кирпечне дә өя алам, балта осталыгын да беләм, эретеп ябыштыру эшләрен дә башкарам. Кадак та суга, аны тартып чыгар да алам, – дип көлә Владимир Григорьевич.  – Нәрсәдер эшләү – минең яраткан шөгылем. Әйтик, хуҗалык арбаларын мин үз кулларым белән ясадым. Дусларым миңа: “Григорьевич, нәрсә өчен борчыласың. Кибеттән сат та ал”, – диләр. Ә мин һәрчак: “Юк, егетләр, үзем эшлим, сыйфатлы  һәм озакка җитәрлек итеп ясыйм. Ә сатып алганнарга 50 килограммлы берәр йөк салсаң, алар таркала да чыга”, – дип җавап бирәм.

Эш белән шөгыльләнү – ир кешенең канында. Ике ел элек ул юбилеена үз урамында үзенә күпме яшь шулкадәр  агач утыртырга ниятли һәм хыялын тормышка ашыра ала – нәкъ менә 70 җиләк-җимеш агачы Лермонтов урамында матур булып үсеп утыра.

Владимир Корсаков лаеклы ялда рәхәтләнеп хуҗалык эшләре белән шөгыльләнә, бакчада эшләргә ярата. Аның алты баласы, дүрт оныгы, оныкчыгы да бар.