Хәйдәр Габдуллин “И. С. Казаков” КФХда 2017 елдан бирле механизатор булып эшли

Хәйдәр Габдуллин “И. С. Казаков” КФХда 2017 елдан бирле механизатор булып эшли. 

Ул Баймәт авылында туа, шуңа күрә авыл хезмәтенең ничеклеген кече яшьтән үк белә. Агрономлыкка укып чыккач, белгечлеге буенча озак эш­ләми, техникага өстенлек бирә. Рульдә ул 40 елдан артык, һәм шуның якынча 20 елында авыл хуҗалыгы машинасын йөртә – механизатор булып хезмәт куя.   
Хәйдәр Габдуллин Тәтештә яши, шулай да көн саен Урюмга эшкә йөри. 

– Миңа авыл хуҗалыгында эшләү ошый. Үз хезмәтемнең нәтиҗәсен: язын без чәчкән орлыклар тишелеп чыгуын, иген­нәрдә тук башаклар барлыкка килүен күргәч, сөенәм. Сезонлы барлык эшләр үзенчә авыр һәм җаваплы. Икмәк җиңел генә бирелми. Кышын да эшсез утырмыйбыз, ашлыкны сортларга аерабыз, техниканы кырга чыгарга әзерлибез. Әгәр җимерелүләр булса, аларны үзебез төзәтәбез. Куллар инде үз эшен белә, – дип елмаеп уртаклаша Хәйдәр Ва­рис улы. – Мин эшли башлаганнан алып хезмәт шартлары үзгәрде. Хәзер без заманча техникада эшлибез, ул бик уңайлы, аның җитештерүчәнлеге дә югары. Без инде көзге бодайны урып-җыйдык, хәзер борчакны урып-җыю белән мәшгульбез. Уңдырышлылык сөендерә. Тиздән көз җитә, шикәр чөген­дерен алуга керешәчәкбез. Аның да уңдырышлылыгы яхшы булыр дип өметләнәм.