Хөрмәт һәм ышаныч яулаган

– Медицина хезмәткәре булырга һич кенә дә уйламаган идем, повар булырга хыялландым, – дип сөйли ул. – Шулай бервакыт, бакчада яшелчәләргә су сипкәндә, мине медицинада эшләргә барам дигән уй биләп алды, әйтерсең лә ниндидер рухлану таптым. Карарым катгый иде – мөстәкыйль рәвештә киттем, кабул итү комиссиясенә документларымны тапшырдым, ә аннары медицина училищесына укырга кердем.   
Кыз дәресләр 7 сәгать 20 минутта башланган, ә 18 сәгать 30 минутта тәмамлаган вакытларга эләккән, ә бер сынау үткәрү елында 6 сәгать 20 минуттан укый башлаган, өенә 17 сәгать 30 минутта кайтып киткән. Надежданың күпчелек сабакташлары өчен мондый уку барышы чыдамлыкка бик зур сынау булган, ләкин ул моны авырлыкка санамаган, чөнки авыл кызы өчен иртә тору гадәти хәл булган.  

– Укуы кызыклы, укытучыларыбыз искиткечләр иде, кызлардан һәм училищедан аерылу ямансу булды, – дип искә төшерә тәҗрибәле шәфкать туташы. – Әмма моның белән беррәттән, без эшләргә, яңа тормышка аяк басарга теләдек. Мин 1993 елның 1 июлендә диплом алдым, ә 5 июльдән туган авылым Килдештә фельдшер вазифасында эшли башладым. 

Медицина хезмәткәре белдер­гәнчә, хезмәт шартлары яхшырсын иде дип телисе генә калган, югыйсә аерым бина, урын да җитәрлек, ләкин кышын салкын булган, мичкә ягып җылытканнар, суны колонкадан ташыганнар, карны чис­тартканнар. Башта штатта санитарка булган, ә аннары бу вазифаны кыскартканнар, көнкүреш мәшәкатьләрен Надежда Николаевна үзе башкарган. 

– Безнең авылда 300 гә якын кеше исәпләнде, мин барысын да белдем, мәктәп, балалар бакчасы, авыл хуҗалыгы предприятиесе бар иде.

Бөтен җаваплылык белән эшләргә тырыштык, ке­шеләр минем һәрчак элемтәдә булуымны белделәр. Киртәле егетенә кияүгә чыккач, үземнең ФАПка теләсә нинди һава торышында да җәяү йөрдем, салкын һәм буранлы кышта юлны ике сәгатькә якын вакытта уза идем. Утыз ел стажымның 15 елын Кадышта эшләдем, – дип уртаклаша фельд­шер. – Килдешкә күченгәндә, учас­тогымда 500 гә якын кеше иде, хәзер дә шунда яшим һәм эшлим. ФАП авылның мәдәният йорты бинасында урнашкан, эшләр өчен шартлар әйбәт. Кабул итү, балалар, хезмәт күрсәтү, тикше­рү бүлмәләре җиһазландырыл­ды. Диспансеризация башланган чакта безнең ФАП район базаларының берсе иде, башка авыллардан да кешеләр килде. 

Медицина хезмәткәре авылдашлары турында хөрмәт белән сөйләде, аларның бердәмлеген һәм якындагыларга ярдәм итәргә теләүләрен билгеләп үтте. Ул җирле авыл хуҗалыгы предприятиесе җитәкчесе Виктор Абрамовны шундый кешеләрнең берсе дип атады.

– Килдештә коронавирус котырынган вакытларда Виктор Ильич безгә иганә ярдәме күрсәтте, ФАПка системалар өчен терәкләр, пульсоксиметрлар сатып алды, бензин бүлеп бирде, чөнки миңа авырган кешеләрнең өйләренә көненә бер-ике тапкыр барырга кирәк иде, – ди фельд­шер. – Халыкның күпчелеге – өлкән яшьтәге кешеләр. Аларның сәламәтлеген күзәтеп тору өчен медицина тикшерүе урында үт­кәрелә, ЭКГ ясыйм, анализлар өчен кан алам, күзләрен тикшерәм, авыл кешеләренең исемлеген тар белгечләргә алып барам. Аннары аларны җыю һәм алга таба диспансеризация үткәрү өчен Тәтешкә җибәрүне оештырам. Минем карамактагылар – молодцылар, – ди Надежда Николаевна. – Үзләре­нең сәламәтлекләрен кайгырталар, табибларның киңәшләрен һәм билгеләгән дәвалануларын үтиләр. 

Быел дүрт сабыйның якты дөньяга аваз салуы авыл фельд­шерын сөендерә.

– Хәзерге вакыт өчен бу бик әйбәт, – ди фельдшер. – Күзәтү өчен сабыйларның өй­ләренә барам, шулай ук мәктәп укучыларын карыйм, прививкалар ясыйм. Мәҗбүри процедуралар үткәрүдән тыш, күзләрен тикшерәм. Ата-аналарга бала­ларының линзаларын яки күзлекләрен вакытында алыштырырга һәм, әлбәттә инде, мәктәп укучыларының гаджетларда утырган вакытларын күзәтеп торырга кирәк дип искәртәм.  
Чын медицина хезмәткәре нинди сыйфатларга ия булырга тиеш дигән соравыма, Надежда Николаевна беренче чиратта ярдәмчеллек һәм киң күңеллелек ди. Чит кешеләрнең әрнү-сагышын читләтеп үтә алмыйм, дип белдерә ул. Авыл кешеләре әйтүенчә, алар моның шулай икәнлеген беләләр, шуңа күрә дә ФАП мөдире аларның хөрмәтен һәм ышанычын яулый алган да инде.