Җыр белән гомер буйлап

(Тәтеш, 29 июль, “Тәтеш таңнары”, Лина Тихонова). 

Ул Олы Тархан районы Чуаш Чагылдымында туган, баш­лангыч мәктәпне дә шунда тәмамлаган.

–  Чуаш Чагылдымы авылында тудым, гаилә ишле, әти-әни һәм җиде бала идек, – дип искә төшерә Зиновий Петрович. – Авыр яшәдек. Әти йортка берникадәр булса да акча яки азык-төлек алып кайту өчен яз аеннан сарык көтүе көтәргә китә иде, җәйге каникулда мин дә аңа ярдәм иттем. 

Мәктәпне ул Буа районының Иске Борындык авылында тә­мамлаган, шунда рус теленә дә өйрәнгән, анда хәтта комсомол оешмасы секретаре да булган. 
Чыгарылышка Чагылдым авылы клубында мөдир булып эшләргә тәкъдим иткәннәр. Авылда татарлар да, чувашлар да яшәгән, шуңа күрә киң күләмле чаралар төрле телләрдә үткәрелгән, күрше авылларга концерт куярга барганнар, авыллар арасында иҗат отчетлары һәм бәйгеләр әзерләгәннәр.  

Аңа Олы Тархан авылы мәдә­ният йортында да сәнгать җи­тәкчесе булып эшләргә туры килгән, җәен анда велосипедта барып йөргән, ә кышын – юлда очраган транспортка утырган. Ә инде Бакырчы клубына мөдир итеп күчерелгәч, анда сәнгать җитәкчесе Лидия Михайлованы очраткан, аннары ул аның гомер буена иңне-иңгә куеп барырлык тормыш парына әйләнгән. Милләтләре буенча алар чувашлар булсалар да, татар авылында да бик яхшы эшләгәннәр, татар телендә спектакльләр куйганнар.  

Морозкиннар 1967 елда гаилә корганнар, аларның өч уллары якты дөньяга аваз салган, әби белән бабайның хәзер биш оныгы бар. 
Сәләтле оештыручы, җаваплы хезмәткәр “Алга” колхозының дуңгызчылык фермасында мөдир булып хезмәт куйган, партия мәктәбендә укуын тәмамлаганнан соң – колхозның партоешма секретаре, аннары Бакырчы авылы Советы рәисе булган. 

Шулай да лаеклы ялга чыгар алдыннан соңгы сигез елда ул кабат Чагылдым авылы клубы мөдире вазифасында эшләгән. 

– Хезмәт юлымны авыл клубы мөдире булып башладым һәм шулай ук мөдир буларак тә­мамладым, – ди елмаеп Зиновий Петрович.  

Инициативалы авыл кешесе пенсиядә дә авылның старостасы иҗтимагый вазифасында эшләвен дәвам итә. Ул хәзерге вакытта “Пилеш” фольклор ансамбленең актив катнашучысы булып тора, ул анда хатыны Лидия Егоровна белән ансамбль оешканның беренче көненнән (2005 ел) борынгы җырларны саклаучылар булып торалар. 

Сүз уңаеннан, ир белән хатын быел гаиләнең ныклык символы – зөбәрҗәт туйларын билгеләп үтәчәкләр. Авыл кешеләре тирә-юньдәгеләрне сөендереп, ярату һәм татулыкта бергәләп гомер кичерәләр. 

фото: Морозкиннар гаилә архиваннан