Җәен укучылар арта

(Тәтеш, 27 май, “Тәтеш таңнары”, Галина Таҗетдинова). Пролей-Каша авылы китап­ханәсе китапханәчесе Ирина Краснова үз вазифасында күптән түгел генә, әмма үз укучыларын әдәбият белән дә, бинаның тышкы кыяфәте белән дә җәлеп итәргә тырыша. 

– Узган ел яңа обойлар ябыштырдым, киштәләр асып куйдым, рамнарны буядым, кызык­лырак итү өчен идеяләрем тагын бар әле, – дип сөйли Ирина Александровна. – Кешеләргә безнең кечкенә, әмма чын белем йортына килү күңелле булсын иде.

Китапханәнең китап фонды хәзерге вакытта 3925 саклау берәмлеген тәшкил итә, бүгенге көндә 200дән артык кеше килә.

– Җәй көне минем янга халык күбрәк йөри, – ди авыл кешесе. – Каникулларга туганнарына укучы балалар кайта, аларда укырга кирәкле әсәрләр исемлеге бар, эзлим, бирәм. Җәй көне дә балаларның китап укуларына шатмын. 

Китапханәче авылда иң күп китап укучы дип лаеклы ялда булган Елена Прокопьеваны атый. Ул авыл китапханәсе урнашкан мәктәп бинасыннан ерак яши, сирәк йөри, әмма берьюлы берничә китап ала.

– Хәзер аңа нинди генә китап тәкъдим итсәм дә, Елена Александровна мин аны укы­дым инде, ди. Тәтешкә килгәч, аның өчен район ки­тап­ханәсеннән яңа китап­лар алып кайтам. Авылда аз хәрә­кәтләнүче кешеләр бар, аларның өйләренә йөрим, китаплар, вакытлы матбугат алып барам. Ивановкага киләм, анда да китапханә пункты эшли, кирәкле китапларны тәкъдим итәм, әлбәт­тә.

Ирина Александровна үз эшен­дә Интернет куллана, һәм ис­ке журналлардагы кайбер ма­териалларның да вакыт-вакыт бик тә кирәге чыга, ди.

Аңа нинди һөнәр ошый соң дигән сорауга авыл китап­ханә­чесе болай дип җавап бирә:

– Кешеләр белән аралашу ошый, үзем дә укырга яратам, шулай ук укуга кызыксыну сүн­мәвен телим, һәм бу юнәлештә, югары сүзләр­гә карамастан, китапханә­челәр бик зур эш ­башкаралар дип саныйм.

фотоны Ирина Краснова тәкъдим итте