Байраш авылында быел Нәүрүз бәйрәмен аеруча зурлап, күңелле итеп үткәрделәр

Бәйрәмне ачып җибәргәндә мәдәният хезмәткәрләре: «Кадерле авылдашлар! Нәүрүз — ул яңарыш бәйрәме. Күңелләрегездәге барлык төшенкелекләр эреп юкка чыксын, аның урынына изгелек һәм яктылык килсен!» — дип белдерделәр.

Чараның иң кызыклы өлеше — Нәүрүзбикәнең килүе булды. Ул ак теләкләрен җиткереп: «Менә мин килдем! Сезгә бәрәкәт, муллык һәм иминлек алып киләм!» — дип, авыл халкын котлады. Балалар исә төрле такмаклар әйтеп, язны чакырдылар:

«Нәүрүз килде, карагыз! Күңел ачып калыгыз!» — дип яңгырады аларның шат тавышлары.

Бәйрәмнең төп бизәге — кайнар ботка һәм хуш исле чәй булды. Аш-су остасы Тәнзилә Йосыпова авылдашларын чакырып: «Тәмле боткабыздан авыз итегез, быелгы ел уңышлы булсын дип телик!» — дип һәркемгә сый өләште.

Байрашлылар Нәүрүзне зур бердәмлек белән каршы алдылар. Бу бәйрәм авыл халкының йолаларга тугры калуын тагын бер кат исбатлады.

фотоларны Тәнзилә Йосыпова тәкъдим итте