“Без беренче карлыгачлар идек”

(Тәтеш, 6 май, “Тәтеш таңнары”, Дания Халимова, фотоны Гүзәлия Гафиятуллина тәкъдим итте).

–  “Тәтеш таңнары”ның бер битен дә калдырмыйча укып барам. “Үт­кәннәрдә – тарих” сә­хифәсендә элекке педагогика училищесы укытучылары турында язылганнарны аеруча да кызыксынып укыдым. Чөнки мин үзем дә 90 – 92 нче елларда педагогика училищесы студенты идем, – дип яза Гүзәлия Нурулла кызы. – Без  ул чакта педагогларыбызның биографияләрен белми идек бит инде. Кү­бесе илебезнең төрле төбәкләреннән килеп, Тәтештә төпләнеп калган  булганнар. Горурланып та куйдым әле. Бигрәк гыйлемле укытучылардан белем алдык дип. 
Менә мин дә үземне укыткан педагогым Фалих Гарипович турында язарга булдым әле. Без тәүге татар төркеменең беренче карлыгачлары идек бит, ул безнең җитәкчебез иде. Үтәмештән Миләүшә Әхмәдуллина, Бидәңгедән Әлфия Минкина, Бакырчыдан Әлфия Салихова, Тормыдан Кәүсәрия Хөснетдинова, Миләүшә Гатауллина, Тә­тешнең 1 нче мәктәбендә озак еллар татар теле укытучылары булып эшләүче Әтрәч кызлары Рузилә Хәмидуллина белән Гүзәлия Исмәгыйлева – барыбыз да сайлаган һөнәребезгә туг­ры калдык. Бүгенге көндә дә мөгаллимәләр булып эшләвебезне дәвам итәбез. Данлыклы педучилищеда без Апас, Әлки, Буа, Чүпрәле, Балык Бистәсе, Кама Тамагы, Каратун, хәтта Киргизиядән кайткан кызлар белән бергә укыдык. Апас “Йолдыз”ының баш мөхәррире Гүзәл Хилавиева да безнең төркемдәш. 
Укытучы Тәнзилә Хә­бировна Фазлыева татар телен бе­ренчеләрдән булып укытты. Безгә шулай ук педагоглар Мәрь­ям Юнысовна Дубровская (мәрхүмә инде), Дания Ис­кәндәровна Җи­һаншина да белем бирде. Мөгаллимә Сәлимә Сәла­ховна Арсланова татар теле дәреслә­рен шулхәтле мавыктыргыч итеп үткәрде, аның дәресләрен һәрчак көтеп ала идек. Тәтештәге 2 нче урта мәктәп укытучысы Сария Хәнәфиевна Фәткуллинага педагогика практикасын үтәргә бара идек. Татар теле, туган тел дәресләрен аның җитәкчелегендә уздырдык.  Ә инде Нурания Нурлыгаяновна  белән Фалих Гарипович Гариповлар безнең төркемнең әти-әнисе кебек булдылар. Фалих Гарипович әтиләрчә кайгырту белән кайгыртты. Таләпчән, азрак кырыс, шул ук вакытта күңелебезне аңлый белә торган  мөгаллим иде ул. Иде дим, чөнки алар күптәннән лаеклы ялда. Нурания апа безнең белән концертлар, театрлар оештырып, район авылларына алып чыгулар дисеңме, барысы да кичә генә булган кебек. Гәрчә, 30 ел үтсә дә. Тормыш сукмагының аерым бер борылышында үз канаты астына алган, төпле белем, тиешле тәрбия биргән, һөнәр иленә юл ярган педагоглар күңелдә олы хөрмәт уяталар һәм хәзер дә әле матур хатирәләр булып йөрәк түрендә сакланалар.