Бозга кермәгез

Боз кату вакыты якынлашу сәбәпле, су объектла­ры кешеләр гомере һәм сә­ламәтлеге өчен куркыныч тудыра.  Күп кешеләр боз нык­лыгын көтеп тормыйча, тыючы билгеләргә карамыйча, моның нәти­җәләре турында уйламыйча, юка боз өстенә керә.

– Ел саен боз ­барлык­ка килә башлаганда кеше­ләр­нең боз астына төшеп китү очраклары теркәлә. Шулай итеп, 2023 – 2024 елларда әлеге сәбәп аркасында Кама Тамагы инспекторлык участогы территориясендә бер кешенең гомере өзелде, 34 кеше коткарылды, – дип билгеләп үтә Россия гадәттән тыш хәлләр министрлыгының ТР буенча Баш идарәсе КСДИ үзәгенең Кама Тамагы инспекторлык участогының кече суднолар буенча өлкән дәүләт инспекторы Алексей Ананьев. – Кешеләрнең (боз астыннан балык каптырырга яратучыларның) бозга күмәк керүен тикшереп тору өчен, Татарстанның су объектларында боз ката башлагачтын һава белән кабартылган мендәрле судноларны кулланып тәүлек әйләнәсе эшли торган коткару пост­лары куелачак. Балыкчылар иң күп җыела торган урыннарга тәүлек әйләнәсе кизү торучы 9 пост кую ниятләнә. Безнең учас­ток җаваплылыгындагы зона буенча, аңа Спас, Тә­теш, Кама Тамагы районнары керә һәм балык тотарга яратучыларның күпчелеге шунда бара, “Кама киң­лек­ләре” РТБ базасына аерым пост ­куелачак.

Кече суднолар буенча дәүләт инспекциясе инспекторлары балык тотарга яратучыларга көз айларында һәм боз каткан вакытларда суда бәхетсезлек очракларын булдырмас өчен саклану чараларын искә төшерә: 
боз барлыкка ки­лә торган вакытларда тө­зек булмаган йөзү җай­лан­маларында һәм ПВХ­дан ясалган көй­мә­ләр­дә сулыклар­га кермәгез, чөнки су­ның температурасы тү­бән булганда йөзүчәнлеге, батмавы һәм ныклыгы белән өстә­мә җиһазландырылмаган моторлы көймәләрнең бортында боз барлыкка ки­лә, ПВХ көймәләргә боз кисәкләре бик җиңел генә зыян китерергә һәм бик зур булмаган дулкында да моторлы көймә батарга мөмкин;
коткару әйберлә­рен­нән башка (жилет, махсус изү һәм башкалар) бозга кермәгез;  
йөзү әйберенә чиктән тыш авырлык китермәгез.

Кешенең салкын суда гомере өзелүнең төп сәбәбе – туңу, чөнки организм тарафыннан эшләп чыгарылган җылылык, югалткан җылылыкны тәэмин итәр өчен җитми.

Салкын суда үлем очрагы кайчакта тән суынганчыга кадәр үк бик күпкә алданрак та булырга мөмкин.  Моңа салкыннан шок сә­бәпче булырга мөмкин, аның кайчакта суга төшеп киткәннән соң беренче 5 – 15 минутта барлыкка килү ихтималы да бар. 

Үлемнең сәбәбе булып шулай ук сулау функциясенең бозылуы, тактиль сизгерлекнең тиз югалуы да булырга мөм­кин. Коткару көймәсе белән янәшә торганда, бәла-казага дучар булган кеше кайчакта үзлегеннән көймәгә менә алмый, чөн­ки бармак тиресенең тем­пературасы әйләнә-ти­рәдәге су температурасына кадәр төшә.

– Ата-аналарга аерым үте­неч: балаларыгызны һәр­вакыт күзәтчелектә тотарга һәм аларның кайда икәнлеген, бигрәк тә боз ката башлаган вакытта, белеп торырга, аларны уйламыйча эш йөртүдән кисәтергә тиешсез! – ди Алексей Владимирович.  

Ул шулай ук боз ката  башлау вакыты якынлашу белән бәйле кече суд­но­лар­ның сулыкларга керүен туктатырга, аларны сулыклардан чыгарырга һәм судноларны кышкы саклауга кую буенча тиешле эшләрне башкарырга кирәклеген билгеләп үтә. 
фото: архив/Авангард