Кама Тамагы районында адашкан инвалид пенсионерны чокырдан тапканнар

(Казан, 15 июль, “Татар-информ”). Кама Тамагы районында кичә өеннән чыгып киткән 81 яшьлек инвалидны чокырдан тапканнар. Бу хакта “Татар-информ”га Татарстан Гадәттән тыш хәлләр министрлыгының матбугат хезмәтендә хәбәр иттеләр.

“Бүген 9:00 сәгатьтә ашыгыч хезмәтләр чакыру өчен 112 бердәм номерына Сөйки авылында яшәүче 81 яшьлек инвалид ирнең өеннән чыгып китүе һәм кайтмавы турында хәбәр иттеләр”, - диделәр матбугат хезмәтендә.

Гадәттән тыш хәл булган урынга килгән №116 эзләү-коткару бүлеге хезмәткәрләре, №1 эзләү-коткару отряды коткаручылары һәм волонтерлар тирә-яктагы авылларны,20 квадрат чакрым мәйданда урманны, якын-тирәдәге чокырларны йөреп чыккан.

16:45 сәгатьтә адашкан пенсионерны авылдан ике чакрым читтәге чокырда табалар. Соңрак өлкән яшьтәге ирне тикшерү өчен Кама Тамагы район үзәк хастаханәсенә алып китәләр.

Фото: ГУ МЧС России по РТ

 https://tatar-inform.tatar/news/2019/07/15/189844/