Күренекле табиб Вахитов урамында туган

(Тәтеш, 12 ноябрь, “Тәтеш таңнары”).

Шәһәрле Мария Зелен­цова ­журналистларга Ва­хитов урамында туган табиб Илдар Камалов бе­лән таныш булуы турында сөйләде, бу Милица Иванованы шактый гаҗәп­ләндерде. Ул шушы урамның тарихы турындагы мәгълүматларны җыя, ләкин анда Камаловлар гаиләсе яшәгәнлеген белмәгән.

– Мария Зеленцова хатирәләре басылып чыкканнан соң, миңа Гүзәлия Насыйбуллина (Гыйзиева) шалтыратты. Камаловлар аларның туганнары булып чыкты. Табиб Илдар Исхаковичның Вахитов урамындагы 11нче йортта (элекке нумерация буенча 47нче) тууы хакында сөйләде. Ни аяныч, йорт юк, ул янды, хәзер аның урынында үлән кап­лаган буш урын тора. Йортта берничә гаилә, шул исәптән ире Исхак белән Гөлчирә Камалова да яшәде. Аларның улы Илдар (булачак табиб – медицина фәннәре докторы, профессор) туды. Ул җиде яшькә кадәр фәкать татарча гына сөйләште. Аннары гаилә Казанга күченеп китте. Аның әтисе Исхак ел саен Тәтешкә Сабан туена кайтып йөрде. Гүзәлия әтисе белән ничек итеп Казанда Камаловларда кунакта булуларын, бергәләп В. И. Ленинның музей-йортына баруларын хәтерли, – дип сөйли Милица Николаевна. –  Биографик мәгълүматларның күбесендә табиб Илдар Камалов Казанда туган диелгән. Ләкин бу алай түгел. Ул 1939 елның 25 апрелендә Тәтештә Вахитов урамында туган.  

Биографиядән: 
Илдар Исхак улы Казан медицина институтын тә­мамлаганнан соң, берен­че җиде елда Буа һәм Яшел Үзән районнары үзәк хастаханәләрендә табиб-хирург булып эшләгән. Ул участок, районара, шәһәр хастаханәләреннән, мед­санчастьтән алып өлкә һәм рес­публика хастаха­нәләренә кадәрге табиб­лык эшчәнлегенең барлык бас­кычларын узган. 17 ел табиблык эшчәнлегеннән соң фәнгә килгән, югыйсә фәнни-тикшеренү эш­чәнлеге белән 1969 елда ук актив шөгыльләнә башлаган булган. 1971 елдан аның хезмәт, җәмәгать эшчәнлеге Казан травматология һәм ортопедия фәнни-тик­шеренү институты белән бәйле, ул анда 14 ел нейрохирургия бүлегендә эшләгән һәм табиб-рентгенологтан өлкән фәнни хезмәткәргә кадәрге юл­ны үткән. 1972-1985 елларда Илдар Исхак улы Казан ГИДУВның табиб-курсантларын укыткан, аннары Целиноград һәм Башкортстанның медицина институтларының рентгенология һәм медицина радиологиясе кафедрасына җитәкчелек иткән.  Ә 1994 елдан Казан дәүләт медицина институтының нур диагностикасы һәм нур терапиясе кафедрасына җи­тәкчелек иткән. 
Профессор Илдар Камалов 2015 елның 23 сен­тябрендә вафат булган.

фото: cyberleninka.ru