Мәчетләр изге юлга, яхшылыкка өнди

(Тәтеш, 6 ноябрь, “Тәтеш таңнары”, Сания Сәмигуллина).

–     Безнең авылда яңа мәчеттә тәүге азан тавышы 1997 елның 1 августында яңгырады. Мә­четебез шул вакыттан алып авыл халкының булышлыгын тоеп көн күрә. Мин дә нәкъ шул чактан алып авыл имамы булып эшли башладым. Авылда мәчет ачылган мәлдә мин Байраш мәктәбендә гарәп телен укыта идем һәм шуннан соң туган авылыма имам итеп билгеләп куйдылар. Ике эшне берьюлы алып бардым. Аңа кадәр Казандагы мәдрәсәдә 4 ел югары белем алган идем. Дин гыйлеме алуым әлегә кадәр минем хезмәтемдә мөһим урын алып тора. Авылдагы дини йолаларны да үзем башкарам, – дип сөйли Рөстәм хәзрәт.
Әңгәмәдәшем билгеләп үткәнчә, ул 2003 елда Алабирде мәктәбендә ­тарих һәм хезмәт укытучысы булып эшли башлаган. Хәзерге вакытта мәктәп­тә фәкать 4нче сыйныфлар өчен генә “Дин тарихы нигезләре” фәнен дә укыта икән. Мәчет бер ка­расаң авылның тарихы белән тыгыз бәйләнгән. Аллаһ йорты ке­шеләрне тәртипкә са­лу­да, әдәп-әхлак, тәр­бия мәсьәләсендә зур әһә­мияткә ия. 

– Шунысы сөендерә, мә­четебездәге мәдрәсәдә балалар өчен һәр көнне кич белән өстәмә укулар алып барыла. Ә инде кышларын өлкәннәр өчен дин гыйлеме: гарәп те­ле графикасы һәм “Ислам ди­не нигезләре”  укытыла. Җомга намазына олылар да, яшь­ләр дә, балалар да килә. Мәхәлләбездә барлык уңайлыклар да бар. Газ кертелгән, җылы. Мәчет чыгымнарын дини ашлар үткәргән вакытта җыелган акчага каплыйбыз. Ә инде ремонт ясаганда иганәчеләр бик булыштылар, көндәлектә инде сәдака акчасына яшибез, – дип уртаклашты Рөстәм Тәлгать улы.
Алабирде авылында халык та күмәк икәнлеге ачыкланды. 

– Бездә авыл халкы яр­дәмчел, киң күңелле. Һәр эшкә бердәмләшеп алыналар. Мәсәлән, 1нче май көнне һәр елны зиратларда өмә үткәрелә. Ул вакытта инде читтәге авылдашлар да бик күп кайта. Бергәләп тәртип урнаштыргач, мә­чет янында өйлә намазы укып әр­вахларга дога кылабыз, 150ләп кешегә табын әзерләп коръән ашы уздырыла. Ир-атлар зиратта эшләсә, хатын-кызлар аш-суны барлап, барлык мәшәкатьләрне үз өстенә алалар, – диде авылдашларына җылы теләкләрен белдереп Рөстәм хәзрәт. – Мәчетебез ишекләре һәрчак ачык. Хәтта мөса­фирлар да үтеп барышлый кереп, намаз укып китәләр. Мәчетләр гомер-гомергә изге юлга, яхшылыкка өнди торган изге урын булып тора. 

фотоларны Рөстәм Гарифуллин тәкъдим итте