Олы Тарханда ифтар мәҗлесләре үтә

(Тәтеш, 2 май, “Тәтеш таңнары”).

Тулырак: http://tetyushy.ru/news/mgyyat/agrariylar-igtibarynasyerlarga-professional-pedikyur-kirk

Ифтар табыныннан бер генә уразалы кеше авыз итсә дә, гамәл дәфтәреңә тагын бер көнлек ураза 
савабы языла.

– Олы Тархан авылы мәче­тендә Ураза ае башланганнан алып көн саен ифтар ашлары үткәрелә, – дип уртак­лашты авылның “Ак калфак” бүлеге җитәкчесе Гөлсем Фәткуллина. – Ифтарга олылар да, ураза тотучы балалар да, бабайлар­ да йөриләр. Авылыбызның мөсли­мәләр берлеге рәисе Назирә ханым Койрыкова белән мөгәллимә Рузинә Солтанова  авыз ачар алдыннан үтемле вәгазьләр сөйлиләр.  Аннары җәмәгать намазы укыла. Шунысы сөенечле, өлкән яшьтәгеләр арасында иман юлына баскан яшьләр дә, балалар да бар. 
Гөлсем Назыйм кызы әй­түенчә, ифтарда шулай ук авыл имамы Мәннур хәзрәт ­ гыйбрәтле вәгазь­ләр сөйли, Коръән укый.  
–  Олы Тархан мәчетендә ифтарга кунаклар чакыру матур гадәткә әйләнде. Мондый күркәм гамәлләрдә укытучылар, балалар бакчалары тәрбиячеләре, ки­тап­ханәчеләр, медици­на­ хезмәткәрләре, “Ак кал­фак”­ вәкилләре дә катнаша­лар. Мисалга, Иркинә Хә­мидуллина, Зөһрә Камбеева, Дания Җәләлова ифтар ашларын әзерлиләр. Ифтарда катнашучылар арасында ураза тотучылар, намазга басучылар да, мохтаҗлар да бар. Димәк, йөрәкләргә үтеп керерлек вәгазьләрнең файдасы зур. Ифтар авыз ачу гына да түгел, ул – аралашу, бер-береңнең хәлен белү, вәгазьләнү дә. Өстәлләр пешергән ризыктан, алып килгән күчтәнәчләрдән сыгылып тора, – диләр ­ифтарга йөрүчеләр.

Олытарханлылар уртак­лашканча, мәчет каршындагы курсларда белем алучылар йөгерә-йөгерә табын хәзерлиләр, ахырдан барысын да җыеп-юып калдыралар. Көне буе ризыксыз-сусыз торган булсалар да, берсе дә зарланмый. Киресенчә, ярдәм итә алуларына  ихластан шатланалар. 

– Үткәрелә торган һәр ифтар көне турында аерым сөйләргә була, чөнки алар бер-берсенә охшаш түгел. Хәер, уртаклык та­ бар: ул да булса, ифтар­га килүчеләрнең дә, аны уздыручыларның да күп­леге, – диде сөенүен белдереп Гөлсем Назыйм кызы. –  Олы Тархан мәчетендә көн саен күп кешегә табын корыла. Шунысын да әйтеп үтәсем килә: ифтар ризыгы, өйдә пешергәнгә караганда, тәмлерәк була. Кызлар ашларны көн саен төрләндерәләр.Бер көнне токмач ашы булса, икенче көнне итле бәрәңге, ә менә өченче көнне пылау... 

Шушы изге айда бер-беребезгә карата ихтирам­лы булыйк. ­Рамазан ­ае мөбәрәк булсын!