Шигырьләре кешелек байлыгына әверелде

– Бөтен республикабыз һәм илебез зур горурлык һәм рәхмәт хисләре белән истәлек­ле датаны – ялкынлы патриот, Советлар Союзы Герое Муса Җәлилнең тууына 120 ел тулуны билгеләп үтә. Аның исеме дөнья мәдәнияте тарихына алтын хәрефләр белән мәң­гелеккә язылган. Аның тирән гуманизм һәм какшамас батырлык белән сугарылган үлемсез шигырьләрендә берничә буын тәрбияләнде. Муса Җәлилнең югары идеаллар белән рухландырылган һәм кешеләр­гә карата кайнар мәхәббәт белән язылган шигърияте миллионнарның күңеленә юл тапты. Шагыйрьне Ватаныбызда гына түгел, Европа һәм Америкадан алып Азиягә кадәр бөтен дөньяда бе­ләләр һәм хөрмәт итәләр. Аның дистәләгән телгә тәрҗемә ител­гән шигырьләре инде күптән бөтен кешелекнең байлыгына әверелде. Аңа 1957 елда үлемсез “Моабит дәфтәре” циклы өчен бирелгән Ленин премиясе аның батырлыгын тануның югары ноктасына әверелде – ул бу бүләккә лаек булган беренче совет шагыйре. Нацист төрмәләрендә язылган һәм фашизмны фаш итүче шигырьләре камерадашлары тарафыннан саклап калынган. Үлем алдында да сыгылып төшмәгән патриот шагыйрьгә Советлар Союзы Герое исеме бирелү – үлеменнән соң тәкъдим ителгән иң югары бүләк. Һәркемнең дә герой-шагыйрьнең үлемсез шигырь юлларыннан көч һәм илһам алуын телим. Аның тормышы һәм батырлыгы без­нең өчен югары дәрәҗә, намус һәм үз халкыңа тугрылыкның мәңгелек үрнәге булып хезмәт итсен, – дип мөрәҗә­гать итә тәтешлеләргә район башлыгы Рәмис ­Сафиуллов.

фото: Татар-информ