Студентлар үзләренең волонтерлык эшчәнлекләре турында сөйләделәр

(Тәтеш, 2 декабрь, “Тәтеш таңнары”). 

Студентлар үзләренең волонтерлык эшчәнлекләре турында сөйләделәр. 

Алексей Травин:
– Тәтештәге гражданнарны яклау көллиятенә беренче курска кергәч, миңа республикабызның волонтерлык хәрәкәтендә катнашырга тәкъдим ит­теләр, ризалаштым, чөнки моңа әзер идем. Пан­де­мия вакытында во­лон­тер­ларның ярдәме аеруча да әһәмиятле иде. Без берьялгызы яшәүче шә­һәрлеләргә кирәкле әй­берләрне илтеп бирдек. Ул чакта мин үзебезнең мөһим эш башкаруыбыз­ны нык тойдым, әби-бабайлар безгә бик рәх­мәтле булдылар. Шушы аралар­да без Казанга мо­били­зацияләнгән хәрби хезмәткәрләргә киемнәр, азык-төлекләр илттек. Мин солдатларга ярдәм итә алуыма бик ­шатмын.   

Диана Комарова:
– Мин волонтерлык эш­чәнлеге белән Тәтеш­тәге 2нче урта мәк­тәп­тә җиден­че сыйныф­та укыган чакта ук ин­де шөгыльләнә башладым. Без кече яшьтә­ге мәктәп укучылары бе­лән әңгәмәләр уздырдык, өл­кән кешеләргә тимурчылар ярдәме күр­сәттек. Хәзер мин авыл хуҗалыгы техникумы студенты, “Форпост” яшьләр иҗтимагый оешмасында торам, волонтерлык эшчәнлеге – эшебездә­ге юнәлешләрнең берсе. Без экология буенча төрле акцияләрдә катнашабыз, агач үсентелә­ре утыртабыз, чүпләнгән урын­нарны тәртипкә ки­те­рәбез. Кышын ялгыз кешеләрнең йорт яннарын кардан чистартабыз, кирәк чакта, өйләрен барып җы­ештырабыз. Кай­берләре безгә үзлә­ре­нең язмышлары ­хакында сөй­лиләр, аларның элек ничек яшәү­ләре турын­да сораштырабыз, ди­мәк илебезнең тарихын беләбез булып чыга. Безгә рәхмәт әйткәндә кү­ңелгә шулкадәр рәхәт була, хәтта өлкәннәрнең шатлыктан күзләре яшьләнә. Кешеләргә ярдәм итү бер дә авыр түгел, ә безнең ярдәм алар өчен мөһим булып тора.