Суд җәзаны җиңеләйткән

Вакыйга 2025 елның ноябрендә үк башланган, ул вакытта гражданин исерек хәлдә автомобиль белән идарә итүдә гаепле дип танылган. Ул вакытта закон буенча 45 000 сум күләмендә штраф билгеләнгән, әмма акчалар тиешле вакытында дәүләт казнасына кермәгән. Нәтиҗәдә 2026 елның мартында җәмәгать судьясы ир-атны җәзаны үтәүдән читләшүдә гаепле дип таныган һәм аңа РФ АХБ Кодексының 20.25нче маддәсендә каралган иң күп срок – 14 тәүлеккә административ кулга алу билгеләгән.

Ир-ат мондый карар белән килешмичә, югарырак инстанциягә мөрәҗәгать иткән. Үзенең шикаятендә ул законны игътибарсыз калдыру максатын куймавын, ә штрафны уңай сәбәпләр: кереме аз булуы һәм балаларны карау өчен алимент сыйфатында хезмәт хакының яртысына түләү кирәклеге аркасында аның тиешле суммасы табылмавы нәтиҗәсендә түли алмавын аңлаткан. Эш материалларын карап чыккач, район суды, элек чыгарылган карарны үзгәртү өчен нигезләр чыннан да бар, дигән нәтиҗәгә килгән.

Судның матбугат хезмәте сәркатибе Алинә Йосыпова аңлатканча, физик зат­ка җәза билгеләгәндә закон хокук бозу рәвешен, гаепле кешенең шәхесен һәм аның милек торышын мәҗбүри исәпкә алуны таләп итә.

– Җәмәгать судьясының башлангыч карарында Р. элек берничә тапкыр административ җаваплылыкка тартылганлыгы күрсәтелгән иде, бу, күрәсең, карарның кырыслыгына йогынты ясагандыр. Әмма Россия Эчке эшләр министрлыгының Тәтеш районы бүлегенең белешмәләре буенча тикшерү барышында соңгы елда ир-ат өчен хокук бозулар исәпләнмәгәнлеге ачыкланды. Шул рәвешле, аның законны даими рәвештә бозуы турындагы нәтиҗә расланмады, – дип хәбәр итә судның матбугат хезмәте.

Нәтиҗәдә, катлауландыра торган хәлләрнең булмавын һәм ир-атның авыр тормыш вәзгыятен исәпкә алып, суд җәзаны җиңеләйтергә мөмкин дип санаган.

– Штрафны түләмәүдә Р.-ның гаебе исбатланса да, ике атналык кулга алу рәвешендәге җәза чиктән тыш күп дип танылды. Суд административ кулга алу вакытын 14 тәүлектән 5 тәүлеккә кадәр киметте, шуның белән гражданинның шикаятен өлешчә канәгатьләндерде, – дип хәбәр итә судның матбугат хезмәте сәркатибе.

Җәмәгать судьясының карары үзгәр­телгән һәм законлы көченә кергән.
фото: Татар-информ