Татарстанда ике җиңел машина бәрелешкән авариядә зыян күрүчеләрнең берсе үлгән

 Фото: очевидцы

Арча районы хастаханәсендә бу авариядә зыян күргән биш олы кеше һәм өч бала бар.

(Казан, 5 август, «Татар-информ»). Хастаханәдә Татарстанда җиңел машина бәрелешендә зыян күрүчеләрнең берсе үлгән. Бу хакта «Татар-информ»га Татарстан Сәламәтлек саклау министрлыгының матбугат хезмәтендә хәбәр иттеләр.

«Татар-информ» алдан бүген «Рено» һәм «Лада» машиналары катнашында Арча районының Иске Төрнәле авылы янында кичке алтыда юл-транспорт һәлакәте булганлыгын хәбәр иткән иде.

«Барлык зыян күрүчеләрне Арча районы үзәк хастаханәсенә китергәннәр. 33 яшьлек ир-ат алган имгәнүләрдән хастаханәдә вафат булган. Тагын биш өлкән кешенең хәлен табиблар авыр дип бәялиләр. Биш, җиде һәм уналты яшьлек өч бала да хастаханәгә китерелгән. Хәзерге вакытта бер балага операция ясыйлар», - дип сөйләде «Татар-информ»га ведомствоның матбугат секретаре Әлфия Хәсәнова.

 https://tatar-inform.tatar/news/2019/08/05/191033/