Татьяна көне дуслар янәшәсендә узды

Чәй табыны янында дусларча аралашу булды, аннан укучылар үзләре өчен күп яңалыклар алдылар, ә тәҗрибәле шәһәрлеләр үз тормышлары турында сөйләделәр.

Училищеда 41 ел эшләгән Татьяна Петрованы Татьяна көне белән котладылар, ә вокал төркеме аңа музыкаль бүләк ясады. Татьяна Константиновна актив кеше, һәм лаеклы ялда да ул зур иҗтимагый эш алып бара.

Ольга Илларионова үзенең тормыш юлын фотолар күрсәтә-күрсәтә сөйләде: уку, иҗади чаралар, Тоншермада педагогия эшчәнлеген башлап җибәрү, районның социаль яклау бүлегенә җитәкчелек итү, көмеш волонтерлык белән шөгыльләнү... Һәм алга таба да шәһәрленең әле планнары күп.

Нина Ивлева гомер буе педагог булып эшләгән. Ул шулай ук 1945 елда педагогия училищесын тәмамлаган әнисе Софья Игнатьевна турында да сөйләде. Ул сугыш вакытында аларга язарга бернәрсә дә булмавын, моның өчен газета кәгазе кулланганнарын искә төшерде. Укытучылар барысы да югары белемле булганнар, опералар тыңлау оештырганнар, биюләр белән шөгыльләнгәннәр.

— Әниемне Олы Тархан мәктәбенә эшкә җибәргәннәр, — дип хәбәр итте Нина Васильевна. — Татар телен бөтенләй белмәсә дә, ул аны тиз үзләштерә, һәм соңыннан ата-аналар балаларын аның сыйныфына бик теләп бирә.

Көллият укытучысы Мәрьям Минкина да студент елларын искә төшерде, аның укытучылары арасында Нина Васильевна да булуын билгеләп үтте.

Уку еллары, училище педагоглары турында җирле шагыйрә Светлана Пантюхина сөйләде. Ул шигырьләр укыды һәм музейга үзенең җыентыгын бүләк итте.

Чараны оештыручылар — көллият тарихы музее җитәкчесе Елена Чернова һәм педагог Наталья Пигилова болай дип уртаклаштылар:

— Очрашу безнең барыбыз өчен дә кызыклы һәм файдалы булды. Бу яхшы традиция пандемия аркасында өзелде һәм без аны шулай итеп яңадан башлап җибәрә алдык. Өлкән һәм яшь буыннар арасында аралашу җиңел һәм иркен барды, гитарага кушылып җырлаган җырлар чарага аерым бер җылы мохит өстәде.