Татьяна Тимофеева: “Медицина – ул дәвалау сәнгате”

(Тәтеш, 4 март, “Тәтеш таңнары”). Кайчагында кешенең тышкы кыяфәте генә дә аның нинди һөнәр иясе булуын күрсәтүе белән килешәсездер. ­Татьяна Тимофееваның табиб булганлыгын хәтта беренче караштан ук җиңел генә белеп була. 

– Миңа калса, туганнан бирле мин табиб булырга теләдем, – дип сөйли  башлый Татьяна Анатольевна ашыкмый гына, йомшак тавыш белән һәм Людоговкада узган балачагына әйләнеп кайта. – Балачакта миңа хастаханәдә ятарга туры килде. Ул чакта мин табиблар һәм шәфкать туташларын күзәтеп, үземнең дә кешеләргә ярдәм итәсем килде. Өстәвенә, әнием Кече Фролово ­авылында фельдшер-акушерлык пункт­ында, аннары биредә, хас­таханәдә хезмәт куйды.

Татьяна ­Анатольевна сигезенче сыйныфны тә­мам­лаганнан соң, медицина училищесына, аннары медицина институтына укырга кергән. Педиатр булырга уйлаган. 
– Иң изгесе – ул балалар һәм ата-аналар, – ди ул.

Интернатурада укыган­да практика узарга Тәтешкә кайткан. Ул вакытта район хастаханәсенең баш табибы Лидия Перунова булган. Яшь докторны Олы Шәмәк участок хастаханәсенә дә ул юллаган, Татьяна Анатольевнага анда  педиатр да, терапевт та, окулист та, хирург та булырга туры килгән. Бу вакытларны ул бүгенге көндә тормыш мәктәбе дип атый. Медицина институтын тәмамлаганнан соң, 1982 елда Тәтешкә кай­та һәм шушы ук авыл хастаханәсендә баш табиб булып эшләргә керешә.

– Шунда, Олы Шәмәктә яшәдем. Башта хаста­ха­нәдә, аннары аның  янә­шәсендәге йортта. Авырулар чакырганда трактор белән барырга туры килде, чөнки юллар юк, машина пычракта батып кала иде, – дип сөй­ли Татьяна Анатольевна. 

Шулай итеп, авыл җи­рендә ике ел сизелми дә үтеп киткән. Аннары аны район хастаханәсенә педиатр итеп күчергәннәр. Ул үзенең остазлары һәм хезмәттәшләре, табиблар – Александра Черкашина, Александр Дубровский, Розалина Солтанова, Татьяна Шиһабетдинова, Людмила һәм Владимир Вавилиннар, Лидия Перунова, Дамир Мохтаров турында хөрмәт белән искә ала.

Эш күп булган, шәһәр­дәге балаларны гына дә­валап калмыйча, шулай ук авыллардагы сабыйларны да дәвалаган, бала тудыру йортындагы нарасыйларны да күзәтеп барган, төнлә белән кизү торган.  

– Ни аяныч, бүгенге көндә медицинаны еш кына хезмәт күрсәтүгә китереп җиткерәләр, ә медицина – ул дәвалау сәнгате. Нәкъ тә сәнгать, һәркемгә дә, хәтта иң кечкенә пациентка да аерым бер якын килү кирәк, – дип саный Татьяна ­Анатольевна.  

Ул үтеп-китеп йөрү­че­ләрдә еш кына үзенең па­циентларын таный, хәзер инде алар үзләре дә әти-әниләр, әби-бабайлар булганнар – педиатрның һөнә­рендә 40 елга якын хезмәт куюы олы ихтирамга лаек! Ә алар, үз чиратларында, балалар табибын, үзләренә күп тапкырлар ярдәмгә килүчене күрүләренә ихластан шатланалар.

фотоны Лилия Филиппова тәкъдим итте