“Тәтеш таңнары” гәҗите: башлангыч чордан юбилейга кадәр

(Тәтеш,  19 декабрь, Тәтеш таңнары).  Моннан йөз ел элек кебек үк, безнең тугры укучыларыбыз район гәҗитен көткәндә, көнгә берничә тапкыр почта тартмасына күз салалар. Ә яңа санны кулларына алгач, аны беренче биттән соңгы битенә кадәр укып чыгалар, мәкаләләребез геройлары белән бергә аларның җи­ңүләренә һәм уңышларына шатланалар, уртаклаша­лар, теләктәшлек итә­ләр.

“Авангард”ка – йөз ел! 1918 елның ахырында Тәтештә рус һәм татар телләрендә гәҗитләр чыгарыла башлый. “Сабанчы тавышы”, “Эшче һәм крестьян депутатларының Тәтеш Советы хәбәрләре”, “Кызыл маяк”, “Плакат хәбәрчесе”, “Кызыл нур”, “Тәтеш хакыйкате”, Ленинская правда” – шул рәвешле бер атама икенчесен алыштыра. 

1963 елдан район гәҗите яңа исем – бүгенге көнгә кадәр сакланган “Авангард” исеме астында басыла. 

Әйе, аның исеме еш үзгәреп тора, әмма юнәлеше үзгәрешсез кала: ул район депутатлар Советына, партия оешмасына ярдәм итүдән, район халкын мәдәни һәм хуҗалык төзелеше бурычларын үтәүгә мобилизацияләүдән, Тәтеш муниципаль районы үсешен яктыртудан, иң мөһиме һәм кыйммәтлесе – хезмәт кешесе турында язудан гыйбарәт була.

100 еллык тарихи дәвер дәвамында барлык буын журналистлары да гореф-гадәтләрне сакларга һәм дәвам итәргә тырыштылар. Район гәҗитендә талантлы кешеләр эшләде – Константин Перов, ул соңрак Татариянең Министрлар Советы рәисе урынбасары итеп билгеләнде; Исхак Казаков, Виктор Николаев, Сергей Глухов, Иван Мыркин, Рәхим Габдрахманов, Борис Потоцкий, Эдуард Трофимов, Ранас Хөснетдинов, Фарук Нәфиев, Мансур Нигъ­мәтҗанов, Людмила Путятинская һәм башкалар.

Районыбыз гәҗите язмаларында респуб­ликаның, районның үткәне һәм бүгенгесе чагылдырыла. 

Гәҗит редакциясе рес­публиканың төрле министрлыклары, ведомстволары грамоталары, дипломнар, рәхмәт хатлары белән билге­ләнде.

Журналистикадагы төп бүләкләрнең берсе – “Бәллүр каләм”гә –  “Авангард” гәҗите дүрт тапкыр лаек булды!

Гәҗитнең популярлыгы турында аның тиражы сөйли: районның һәр дүртенче кешесе, ягъни райондагы һәр гаилә диярлек, барлык яңалыклардан хәбәрдар булырга теләп, район гәҗитен  алдыра һәм укый.

“Авангард”ның бер га­сыр­лык юбилее – ул йөз ел данлыклы гореф-гадәтләр, укучы­ла­­рыбызга йөз ел ­туг­­рылык!
Сезнең “Тәтеш таңнары”