Тәтештә машина йөртүче гүзәл затлар ярышты

(Тәтеш, 22 июль, “Тәтеш таңнары”).

Ул Россия Эчке эшләр министрлыгының Тәтеш районындагы ЮХИДИ бү­леге, Казан шәһәре­нең “Юл хәрәкәте иминлеге” ДБУ территориаль ида­рәсенең Буадагы профилактика бү­леге, Тәтеш автомәктәбе тарафыннан оештырылды.

Бу чара шофер хатын-кызларның машина йөр­тү осталыгын арттыруга, аны камилләштерүгә, юл хәрәкәте иминлеген киң танытуга һәм юлларда им­гәнүләрне булдырмауга юнәлдерелгән.

Тәтеш районыннан сигез бәйгече иң яхшы автоледи титулы өчен көч сынашты. Ярыш юл хәрәкәте кагыйдәләре һәм “Классика” этапларында узды. Беренче этапта гүзәл затлар юл хәрәкәте кагыйдәләре тео­риясе буенча көч сынаштылар, ә икенче этапны узу өчен алар автодромга юл тоттылар һәм машина йөртү осталыгын инде тәҗрибәдә күрсәттеләр. Кече Бисәр авылында яшәү­че Екатерина Хохлова барлык сорауларга да дөрес җавап биреп, юл йөрү кагыйдәләрен белү буенча иң яхшы нәтиҗәне күрсәтте. Ул шулай ук тәҗ­рибә этабында да барлык күнегүләрне тоткарлыкларсыз һәм ялгышлыкларсыз, моңа бүлеп бирелгән 4 минут­ны 1 минут та 58 секунд вакыт аралыгында үтеп чыкты. Нәтиҗәдә ул Тәтеш районының “Автоледи-2022” титулына ия бул­ды. Муниципаль этап җиңүчесе Казанда узачак конкурсның зона этабында беренче урын өчен көч сынашачак. 

– Транспорт йөртү таныклыгын ярты ел элек кенә алдым, ­имтиханга әзерләнгән вакытта юл хәрәкәте кагыйдәләрен ты­рышып өйрәндем, шуңа күрә миңа җиңел булды, – дип уртаклашты Екатерина. – Руль артында бик күптәннән булмасам да, өйрәнү полигонында да биремнәрне уңышлы гына башкарып чыктым. Үз-үземне сынап карау кызык булды, барысын да үтәп чыктым, көтел­мә­гән шатлык кичердем. 

Виктория Глазкова икенче урынны алды, Ольга Арисова – өченче булды.

Казан шәһәренең “Юл хәрәкәте иминлеге” ДБУ ТИ профилактика бү­легенең әйдәп баручы белгече Лилия Вахитова әйтүенчә, барлык автоледилар да лаеклы чыгыш ясадылар, ул аларны әлеге уңышлары белән котлады һәм бүләкләр тапшырды, шулай ук ярышларда катнашучыларга имин юллар теләде.