Зөбәрҗәт Хәйруллина: “Тәтеш таңнары” – аның өчен бик мөһим

Зөбәрҗәт Хәйруллина, Зур Әтрәч авылы:

– Үзебезнең “Тәтеш таң­нары”н бик күптәннән яратып укыйм һәм алдырам. Мин мәктәптә мөгаллимә булып эшләдем, аннары хезмәтемне авыл китапханәсендә дәвам иттердем. Район газетасы белән һәрчак тыгыз элемтәдә торам. “Тәтеш таңнары”ннан район яңалыкларын, якташларым турындагы язмаларны, төрле мөһим мәгълүматларны, Тәтештә һәм район авылларында узган яки үткәреләчәк чаралар хакындагы хәбәрләрне, яңалыкларны кызыксынып укып барам. Зур Әтрәчтә озак еллар иңгә-иң куеп яшәгән гаилә парлары, үрнәк игенчеләр, мактауга лаек укытучылар гомер кичерә. Аларның барысын да газета битләрендә күрәсе килә, әлбәттә. Шуңа да хис-кичерешләремне, фикерләремне редакция хезмәткәрләре белән уртаклашырга тырышам. 

Китапханәнең көндәлек хез­мәте газета-журналлар, китап­лар белән бәйле булганлыктан, тормышны район газетасыннан башка күз алдына да китерә алмыйм һәм аңа язылмыйча калганым юк, чөнки эшебездә газета зур әһәмияткә ия.

Газета аркылы яшьләрдә кече ватанга карата мәхәббәт, ватанпәрвәрлек хисләре тәр­бияләнә. Район газетасы бү­генге көндә һәркемгә дә җир­лектә яшәүчеләрнең язмышын, үткәнен һәм хәзергесен белү мөмкинлеген бирә. Шуның белән дә ул күңелләргә үтеп керә дияр идем. “Тәтеш таңнары” – минем өчен бик мөһим.

фотоны Зөбәрҗәт Хәйруллина тәкъдим итте