Музейда эшләү аның тормыш эше булган

(Тәтеш, 7 июль, "Тәтеш таннары").

Нина Григорьевна һәм музей коллективы тарафын­нан эшләнгән ­яңа алымнар, ул вакыт өчен гадәти булмаган ­идея­ләр Тәтеш музеена яңа дәрәҗәгә чыгарга, районда гына тү­гел, ә Татарстанда да әһә­миятле мәдәни учреждение булырга мөмкинлек биргән.

Нина Панягина 1940 елда Спас районының Спас Затонында Идел киңлекләре буенда туа. Әмма әле иртә балачагында ук гаиләсе белән Тәтешкә күчәләр. Монда, 1957 елда, ул шәһәрнең 1нче мәктәбендә 10нчы сыйныфны тәмамлый һәм педагогия училищесына укырга керә. Аны тәмамлагач, Нина Григорь­евна Яр Чаллы районында башлангыч мәктәп укытучысы булып эшли. Әмма әнисенең авырып китүе һәм Идел буе шәһәрчегенә мәхәббәте аны Тәтешкә кайтара.
1962 елда ул Чинчурино егете Геннадий Панягинга кияүгә чыга. Нина Григорьевнаның гаилә тормышы гына түгел, бай хезмәт тормышы да башлана. Ул пионерлар йортында массовик-инструктор, түгәрәк җитәкчесе, Красная Поляна  башлангыч мәктәбе укытучысы, район китапханәсенең күчмә фонд мөдире, пионерлар һәм укучылар йорты методис­ты, балалар бакчасы мөдире, балалар бакчасы тәрбиячесе ­булып эшли.

Тәтеш шәһәренең барлык укучылары Нина Григорьевнаны белә торган була. Аны еш кына шәһәр стадионында күп кенә әһәмиятле чараларны оештыручы һәм катнашучы ролендә күрергә мөмкин иде, ул мәдәният йорты сәхнәсендә мик­рофон тоткан килеш талантлы рәвештә концертлар алып барды, җырлар башкарды, балаларны биюгә өйрәтте.
1985 елның сентябрь башында Нина Григорьевнаны ТАССРның дәүләт берләштерелгән музееның Тәтеш филиалы мөдире вазифасына чакыралар. Аның саллы фондын өйрәнгәннән соң, ул музей мәйданнарын киңәйтү кирәклеген, музей бинасын тиешле кыяфәткә китерергә, экспозицияләрне һәм башка бик күп нәрсәләрне уйларга кирәклеген аңлаган. Вакытлар узу белән тәтешлеләр һәм шәһәр кунаклары музейны аерым мохите, гадәти булмаган энергетикасы, ачык йөзле һәм кунакчыллыгы өчен яраттылар. Нина Григорьевна ирешелгәннәрдә туктый торган кеше түгел. Аның һәм аның фикердәшләре командасы ярдәмендә музей хәзерге көнгә кадәр дә урнашкан сәүдәгәрләр йортына күчә.
Россиянең тарихи шәһәрләре һәм төбәкләре берлеге тарафыннан Нина Григорьевна “Россия халыклары мирасына керткән өлеше өчен” медале белән бүләкләнгән, аңа “Татарстан Республикасының атказанган мәдәният хезмәткәре” исеме бирелгән.
Нина Панягина 2017 елның 3 июлендә вафат булган.

Наталья Гарустович, кызы: 
– Мин пионерлар йортында үстем дисәм дә була, чөнки әнием анда эшләде. Музейга да аның белән бергә эшләргә килдем. Киемдә ул һәрвакыт зәвыкны өстен күрде. Ул һәр җирдә, хәтта өйдә дә, үзен матур, зәвыклы хатын-кыз булуын күрсәтәсе килде. Ул беркайчан да кешеләр янына чәчен ясамаган килеш чыкмас иде. Ул һәрвакыт эш белән мәшгуль булса да, безне тәмле ризыклар белән сыйларга да өлгерә иде.

Наталья Понедельникова, Тәтеш ягы тарихы музее директоры:
– Һәр чорның үз геройлары. Нина Григорьевна үз вакытының герое була. Бик көчле шәхес иде. Гомеренең соңгы елларында, олы яшьтә  булуына карамас­тан, ул һәрвакыт кирәкле иде. Ул барыбыз өчен дә укытучы булды һәм шулай булып кала да. Нина Григорьевна үзенең соңгы көннәренә кадәр күңел яшьлеген, аралашуның җиңеллеген һәм дөньяны үзгәртү теләген саклады.