Онытылмаслык хәтер

(Тәтеш, 11 февраль, «Тәтеш таңнары»). ТРның атказанган мәктәп укытучысы, РФның мактаулы мәгариф хезмәткәре Дубровская Мәрьям Юныс кызы педагогия эшчәнлегенә 30 елдан күбрәк гомерен багышлаган.

“Яраткан кешемнән, тормыш юлы буйлап атлап барган дустым һәм остазымнан, аның киңәшләреннән һәм ярдәменнән башка мин һөнәри эшчәнлегемдә җитди нәтиҗәләргә ире­шә алмаган булыр идем, – дип башлый сүзен СССРның сәламәт­лек саклау отличнигы, ТАССРның атказанган таби­бы Александр ­Дубровский.

Мәрьям Юныс кызы белән 47 ел иңгә-иң куеп яшәгән иреннән гайре әлеге гаҗәеп кеше турында беркем дә сөйли алмастыр. – Мәрьям Юныс кызы кече яшьтән үк ата-анасының чиктән тыш яратуын, зирәклеген, игелеген күңеленә сеңдереп үскән. Әтисе – Юныс Шәйхи улы Хисаметдинов – сугыштан яраланып кайткан. Әнисе – Әминә Сибгатуллы кызы – ул чакта икмәк кабул итү пунктында эшләгән һәм моның белән бергә үзенең кадерле кешесе турында да кайгыртып яшәгән, аның яраларын халык ысуллары, үләннәр белән дәвалаган, ирен аякка бас­тырган. Аллаһ аларга 55 ел парлы яшәү бәхетен бүләк иткән. Дүрт кыз һәм бер малай аларның йортын шатлык белән тулыландырган. Мәрьям 1947 елның 29 октябрендә (комсомол туган көндә) туган. Ата-аналары барлык балаларга югары белем биргән, ихтирам  рухында, тәртипле итеп тәрбияләгән. Педагогия училищесында 30 елдан күбрәк эшләү дәверендә ул педагог тәҗрибәсенә, осталык һәм тирә-юнь­дәгеләрнең хөрмәтенә ирешкән, шуның 19 елы – тәрбия эшләре буенча урынбасар. “Ул киң күңелле, киләчәкне тө­гәл итеп күрә белә иде”, – дип тасвирлыйлар аны хезмәттәшләре. Мәрьям Юныс кызы педагогикада ирешкәннәрнең барысы да – аның хезмәт сөючәнлеге, максатларга ирешүдә нык­лыгы һәм табигатьтән бирелгән педагог осталыгы, үз эшен яратуының нәтиҗәсе. Ул болай дигән: “Гади укытучыдан бәхетле укытучыга әйләндем һәм шундый бәхет биргән өчен язмышыма рәхмәтлемен”.

Саклаучы-фәрештәм ми­ңа искиткеч балалар – кызым Аннаны (Казанда табиб булып эшли) һәм улым Тимурны, белеме буенча юрист һәм икътисадчы (Росреестрның Тәтеш бүлеге начальнигы булып эшли) бүләк итте, оныгым Артур һәм Эвелина зур шатлыгым”. Мәрьям Юныс кызы 2018 елның 20 августында вафат булды. Йөзләгән тәтешле, аның укучылары аны соңгы юлга озатты (исәпләүләр буенча, Мәрьям Юныс кызы педучилищеда эшләү дәверендә 3 меңнән күбрәк укытучыны укытып чыгаруда ­катнашкан). 

Мәрьям Минкина, МФЦПК – Тәтешнең гражданнарны яклау көллияте җитәкчесе: “Мәрьям Юныс кызы безнең сыйныф җитәкчесе иде. Без беренче курс­ка кердек, ә Мәрьям Юныс кызы безнең белем йортында хезмәтендәге беренче укыту елын башлап җибәрде. Мәрьям Юныс кызы яшь булуына да карамастан, безне барысына да: ничек укырга, үзеңнең көндәлек яшәешеңне ничек уңайлы итеп җайлаштырырга, ничек аралашырга, киенергә, сәхнәгә ничек чыгарга һәм башка күп нәрсәләргә өйрәтте. Рух күтәренкелеге, эш белән мавыгучанлыкны булдыра белде. Иң мөһиме, ул безне битараф булмаска, теләсә кемгә ярдәм күрсәтергә өйрәтте, хәтта әгәр дә барысы да әлеге проблемалардан йөз чөергән булсалар да. Мәрьям Юныс кызы директор урынбасары буларак, туган як материалларына җәлеп итеп, көллияттә татар, рус, чуаш, мордваларның дусларча мөнәсәбәтләренә нигезләнгән традицияләр булдырды. Әле тагын үзенең өендә кунак­лар кабул итәргә яратты. Гаилә учагын сакларга һәм сумкаңны күтәреп әти-әниеңә беркайчан китмәскә дигән зирәк киңәшләр биргәнен хәтерлим әле. “Әти-әниең янында бары тик бер төн куну да җитә, һәм сез ирегез өчен чит-ятка әйләнәчәксез”, – дия иде ул безгә. Кыр чәчәкләрен: күкчәчәк, күгәрчен күзен... яратты”.