Ул чәчәкләр һәм шигъриятне яраткан

(Тәтеш, 18 сентябрь, Тәтеш таңнары).

Анна Григорьевна 1924 елда Тәтеш районы Федоровка авылында крестьян Наталья Николаевна һәм Григорий Кузьмич Любавиннар гаиләсендә туган. Башлангыч мәктәпне туган авылында тәмамлаган, ә бишенче сыйныфка Тәтештәге 1нче сигезьеллык мәктәпкә барган. Анна Григорьевна аны тәмамлап, Тәтештәге педагогия училищесына укырга кергән, һәм, дип­ломлы белгеч буларак, юллама буенча 1942 елда Апас районы Кабык Күпер авылына математика укытучысы булып эшләргә киткән. Сугыш вакыты булган, педагоглар ялларсыз диярлек: кышын –  мәктәптә, җәен –  колхоз кырларында эшләгәннәр. 
Анна Григорьевна 1945 елда туган районына кайткан, Красная Поляна авылында мәктәптә эшләгән, ә өч елдан соң Тәтештәге сигезьеллык мәктәпкә күчкән. Булачак ире белән дә биредә очрашкан. Аларның ике балалары туган.
Вакытлар узгач, Көньяк микрорайон төзелгән, яңа уку йорты таләп ителгән. 1971 елның февралендә Тәтештәге 2нче урта мәктәп ачылган, һәм Анна Григорьевна әлеге уку йортында беренче көннән үк укытучы булып эшли башлаган. Ике ел кызы Нина Чекмарева белән бергә хезмәт куйган. Дөрес, бик тиздән, сәламәтлеге какшау аркасында, аңа эшеннән китәргә туры килгән. 
Анна Григорьевнаның зур осталыгы, үз эшенә җаваплы каравы яхшы нәтиҗәләр биргән: аның укучылары математика олимпиадаларында призерлар булганнар, чыгарылышлар урта махсус һәм югары уку йортларында укуларын уңышлы дәвам иткәннәр.
Педагог Анна Осенкова “Хезмәт ветераны” медале белән бүләкләнгән. 
Ул 2010 елда вафат булган.   
Нина Чекмарева:
–  Әни бик игелекле һәм берникадәр кырыс кеше иде. Ул һәрвакыт нинди дә булса эш белән мәшгуль булды: бәйләде, укыды, чикте, бакчада эшләде. Ул шигъриятне бик яратты, күп авторларның шигырьләрен яттан белде.  Кунакчыл иде. Аның туган авылы Федоровка кешеләре үтеп барышлый бездә еш кунак булдылар. Классик стильдәге киемне өстен күрде. Укучылар аны бик яраттылар. Аның элекке укучысы  Римма Петровна Артемьева һәр елны 1 сентябрьдә әни янына килә һәм аңа чәчәк гөлләмәсе белән шоколад китерә иде. Ул чәчәкләр үстерергә яратты һәм бик әйбәт бәйләде.
Минем фикеремчә, абыем һәм мин математикадан сәләтле булуыбыз белән әнигә охшаганбыз. Ул оныкларын бик яратты, аларга күп вакытын бүлеп бирә иде.

Галина Коткова:
–  Мин Тәтештәге 2нче урта мәктәпкә эшләргә килгәндә Анна Григорьевна инде анда эшләми иде, шулай да без аның белән аралаштык. Ул игелекле, гыйлемле хатын-кыз, аның өендә китаплары бик күп иде. Анна Григорьевнаның яшелчә бакчасында һәрчак илаһи пөхтәлек булды, чәчәкләр үсеп утырды. Бакчалары зур иде. 

Наталья Любавина:
– Анна Григорьевна искиткеч кеше иде. Өйләрендә яхшы китапханә бар иде, ул күп укыды, ишегалды чәчәкләргә күмелеп утырды, бигрәк тә георгиннар күп иде. 8нче сыйныфта укыганда хастаханәгә эләккәч, хастаханәдә шул ук вакытта аның укучылары, Пролей-Каша авылыннан бер кыз һәм Урюмнан бер малай да бар иде. Анна Григорьевна һәр көнне дәресләрдән соң палатага килде һәм аларга материалны аңлатты. Минемчә, шәһәрнең бер ягыннан икенчесенә йөрергә һәркем риза булмас иде, чөнки үз эшләре болай да күп булды. 
Анна Григорьевна тарих белән кызыксынды, авыллар турында бик күп белде, шәһәр педагогларын яхшы хәтерләде һәм бу хакта бик кызыклы итеп сөйләде. Балаларны экскурсияләргә еш алып йөрде, гомумән, ул өлкән яшьтә булуга карамастан, төрле җирләргә йөрергә ярата иде.

Александр Костюнин:
– Анна Григорьевна безне математикадан укытты. Укытучы буларак ул бездән пөхтәлек, төгәллек, ныклап уйланылган карарлар, өйгә бирелгән биремнәрне эшләп килүебезне таләп итте. Шуңа да аның укучыларының күбесе математиканы яхшы белде. 
Анна Григорьевна әдәпле һәм ягымлы булды. Кайчакта күзлек астыннан кырыс итеп караса да, күзләре елмая иде. Миңа ул башлангыч сыйныфларда алган белемне үстерергә ярдәм итте: җиденче сыйныфка барганда мин математиканы 4 һәм 5кә белә идем.