Руль артында исерек булсаң...

(Тәтеш, 31 гыйнвар, “Тәтеш таңнары”). Тәтешнең ЮХИДИ мәгъ­­лүматлары буенча, 2020 елда безнең районда 64 шоферның исерек килеш транспорт йөртүе ачыкланган, шулардан 7 ­хокук бозучы икенче тапкыр сәрхүш хәлдә машинаны йөртергә утырган. Исерек шоферлар гае­бе белән 5 юл-транспорт һәлакәте теркәлгән. Быел 3 шофер исерек хәлдә ­тоткарланган. 

Штраф күләме турында исегезгә төшерәбез
2021 елда руль артына исерек килеш утыру факты беренче тапкыр ачыкланган очракта – 30 мең сум.
Медицина тикше­ре­нүендә катнашудан беренчел баш тарту – 30 мең сум.
Әгәр шофер аек хәлдә булмаса һәм моның белән беррәттән йөртүгә хокукы булмаса – 30 мең сум. Әгәр гражданин шундый статуста медицина тикшеренүеннән баш тартса, шулай ук – 30 мең. Әгәр руль артына исерек килеш утыру факты кабат ачыкланса – 200дән 300 мең сумга кадәр. 
Әгәр транспортны исерек гражданинга йөртергә биреп торсаң – 30 мең сум.
Дәүләт автоинспекциясе хезмәткәрләре билгеләп үткәнчә, санап үтелгән барлык очракларда да, руль артына икенче тапкыр исерек килеш утырган өчен хокук бозучы иң күбе 3 елга кадәр шоферлык таныклыгыннан мәхрүм ителә. 
Исерек килеш велосипедта йөргән өчен штраф күләме – 1 меңнән 1,5 мең сумга кадәр, мопед иярләгән өчен – 30 мең сум.