“Имин тәгәрмәч” әйләнә

(Тәтеш, 28 апрель, “Тәтеш таңнары”).

Конкурс укучыларда сәламәт һәм имин яшәү рәвеше культурасын булдыру максатыннан үткәрелә. Традицион конкурста быел районның белем бирү оешмаларыннан 13 команда катнашты.

Тантаналы ачылышта бала­ларга район башкарма ко­ми­­тетының мәгариф бүлеге на­чаль­­нигы Гөл­нара Кирилина мөрәҗәгать итте:
– Әлеге ярышлар сезнең юл хәрәкәте кагыйдәләрен белү­егезне ныгытачак, киләчәктә – сез үсеп буй җиткәч, җәяү генә йөрмәссез бәлкем, шоферлар да булырсыз, аларның һәркайсы юлларда үз-үзеңне тоту культурасына ия булырга тиешләр. 

Юлның яшь инспекторлары экипажлары алты стан­ци­я­дә: “Юл хәрәкәте кагый­дә­­ләрен белүчеләр”, ­“Ашыгыч яр­дәм күрсәтү нигезләрен белү”, “Автошәһәрчек”, ­“Велосипед­ны бормаландырып йөртү”, “Тормыш иминлеге нигез­ләре”, “Юл хәрәкәте иминлеге өчен – ­бер­гәләп” иҗади конкурсында ­бул­­дылар. 
Кайбер катнашучылар вело­трас­саны җиңел генә үтә алдылар, икен­челәре медицина биремен һәм юл хәрәкәте кагыйдәләре буенча тестларны бик яхшыга үтәделәр. 1нче урта мәктәп укучылары уртаклашканча, аларга бөтен җирдә дә җиңел булган, медицина буенча сораулар гына кыенлыклар тудырган.
Кырыс жюри әйтүенчә, командалар яхшы теоретик, гамәли әзерлек һәм җиңүгә зур ихтыяр күрсәттеләр.

– Юл хәрәкәте тормы­шы­бызның аерылгысыз өлеше булып тора. Шуңа күрә районыбызда яшәүче һәр кешегә юл хәрәкәте кагыйдәләрен урамда да, шулай ук автомобильдә дә үтәргә кирәк. Юл хәрәкәтенең яшь ­инспекторлары – юл хәрәкәте иминлеген пропагандалауда дәүләт автоинспекциясенең иң якын ярдәмчеләре. Алар яшьтәшләренә уңай үрнәк күр­сәтәләр, бу, үз чиратында, юлларда имгәнүләрне булдырмаска ярдәм итә. Бу җәйге каникуллар алдыннан аеруча да әһәмияткә ия, – дип билгеләп үтте ­Россия Эчке эшләр министрлыгы­ның Тәтеш районындагы ЮХИДИ бүлеге начальнигы Рәмис ­Фаризов.   

Ярыш нәтиҗәләре буенча, 2нче урта мәктәптәге юлның яшь инспекторлары җиңүчеләр дип танылды, икенче урынны 1нче урта мәктәп укучылары алды, өченче урында – килдешлеләр, дүртенчелекне нармонкалар алды, бишенче урынны бакырчылар ­яулады.

Җиңүчеләргә һәм призерларга югары нәтиҗәләргә иреш­кән­нә­ре өчен Казан шәһәрендәге “Юл хә­рә­кәте иминлеге” ДБУның Буа территориаль идарәсенең профилактикалау бүле­ге исе­меннән грамоталар, кыйм­мәтле бүләкләр тапшырылды.