“Халык инспекторы” юллар сагында

“Халык инспекторы” мобиль кушымтасы – юллардагы вәзгыятьне кон­трольдә тотарга һәм һәла­кәтләрне киметергә ярдәм итә торган заманча корал.

– Бу кушымта гына түгел, ә иҗтимагый контроль­нең чынбарлыктагы механизмы, – дип ассызык­лый Россия Эчке эшләр министрлыгының Тәтеш районы буенча дәүләт автоинспекциясе бүлеге начальнигы Рәмис Фаризов. – Һәр аңлы граждан юлларда хокук тәртибен тәэмин итү эшендә ярдәмче була ала.

Кушымтаның эшләү асылы гади һәм нәтиҗәле: аның ярдәмендә теләсә кайсы кулланучы юл хәрәкәте кагыйдәләрен бозуны терки ала. Шул ук вакытта сис­тема автомат рәвеш­тә хәбәрне вакыйганың төгәл урынына һәм вакытына бәйли. “Халык инс­пекторы” аша алынган белдерүләр административ хокук бозулар турындагы эшләр кузгату өчен нигез булып тора. Шулай итеп, гражданнарның битараф булмаган мөнәсәбәте турыдан-туры юл хәрәкәтендә катнашучылар арасындагы тәртипне арттыруга ­йогынты ясый.

Бүгенге көндә “Халык инспекторы” 18 категория хокук бозулар буенча хатлар кабул итә, алар арасында җәяүлеләр хәрә­кәтенә комачаулау, кызыл утка чыгу, тукталыш сызыгыннан чыгу, каршы як полосада хәрәкәт итү, иминлек каешын эләктермәү, хәрәкәт вакытында телефонны куллану һәм башкалар бар.

Бүләкләүләр системасы аерым игътибарга лаек: алты категория буенча хокук бозулар турында хәбәр иткән өчен хат авторлары бүләкләнергә мөмкин.

– Хәрәкәт итүдә катнашучы һәркем үз җавап­лылыгын аң­лаганда гына безнең юллар имин булачак, – ди Рәмис Рафаил улы. – “Халык инспекторы” кушымтасы – ул уртак эшкә шәхси өлеш кертү мөмкинлеге.