Илһам Хәйбуллин: “Гореф-гадәтләрне сакларга кирәк”

(Тәтеш, 24 март, «Тәтеш таңнары»). Илһам Рәшит улы сүз­ләренә караганда, башта мәдәният өлкәсендә юл җиңел булмаган, әмма район мәдәният йорты методистлары ярдәм иткән, кешеләр белән аралашу тәҗрибәсе ярап куйган, һәм менә 6 ел инде ул авыл халкының ялын оештыра, балаларның иҗади сәләтләрен үстерә. Үзенең төп ярдәмчеләре итеп ул 15 ел инде үз репертуары белән тамашачыларны сөендерүче “Кызыл миләш” халык ансамблендә катнашучыларны атый. Гармунчы Васыйл Юнысов җырлау өчен теләсә нинди көйне җиңел уйный, ә алар шулай ук борынгы татар җырларын җиңел башкаралар. Ансамбль ел саен Буа­га “Балкыш” фестиваленә бара, тамашачылар бу коллективны белә һәм җылы кабул итә. Укучылар авыл мәдәният йортына бик теләп киләләр. Илһам тамашачыларны вокаль баш­каруы белән генә сөендереп калмыйча, Ал­синә Фәйзуллина белән көйле дуэты конкурсларда призлы урыннар яулый, еш кына сәхнәдә тормыш иптәше Рәмзия белән дә чыгыш ясый.

Истәлекле даталардан һәм бәй­рәмнәрдән тыш, Илһам Хәй­буллин аларның үз матур тради­цияләре булуы белән дә уртаклашты. Ел саен зурәтрәчлеләр “Чишмә бәйрәме” үт­кә­рәләр: Урак­чы чишмәсе янында җыелып, аны чис­тарталар, уха пешерәләр, тәм­ле чәй кайнаталар, бо­рын­гы татар җырларын җырлыйлар, өлкәннәр яшь­ләргә үткәннәре турында сөйлиләр.

– Мондый очрашулар кирәк, алар кешеләрне берләштерә, аралашу җылысын бирә, туган якка мәхәббәт тәрбияли, – ди Илһам Рәшит улы. – Узган ел безнең чишмәне үзара салым акчасына тө­зекләндерә башладык, безнең халык шулай хәл итте. Аллаһы Тәгалә биргән гореф-гадәтләрне һәм матурлыкны сакларга кирәк.

Кешеләр клубка рәхәт­ләнеп ял итәргә генә түгел, төрле чараларда актив катнашырга да киләләр, ди мәдәният хезмәткәре.

– Без кешеләр өчен эшләдек һәм эшлибез, – дип раслый Илһам Рәшит улы, – һәм без тамашачыларга рухи ярдәм күрсәткәннәре өчен рәхмәтлебез.

фото: Илһам Хәйбуллин гаилә архивыннан